Gulsanam Alijonova: Bo‘lib o‘tgan ishlardan xulosa chiqardim. Endi bor e’tiborimni sportga qarataman

Namanganlik sportchi va volontyor Gulsanam Alijonova ayni paytda Toshkentda taekvondo WTF bo‘yicha milliy terma jamoa mashg‘ulotlarida qatnashmoqda. Bu haqda “Daryo” muxbiri Azizbek Abduvaliyev xabar bermoqda.

Alijonovaning aytishicha, u hozirda Toshkentdagi “Universal” sport saroyida mamlakat birinchiligiga tayyorgarlik ko‘ryapti. Mashg‘ulotlar joriy yil 2-oktabrda boshlangan va 40 kun davom etadi.

“Keyin esa navbat Osiyo va jahon chempionatlariga. Eng katta orzuyim esa 2024-yili Fransiyada bo‘lib o‘tadigan Olimpiada o‘yinlarida qatnashish. O‘sha yili 27 yoshga to‘lar ekanman. Bu vazifani uddalayman va g‘olib bo‘laman, degan umiddaman”,— deydi Gulsanam.

Gulsanam mashg‘ulotlarga qatnashish bilan bir qatorda saraton xastaligiga chalingan oyisining salomatligidan ham bezovta ekanligini bildirdi. 58 yoshni qarshilagan onaxon ikkinchi guruh nogironi hisoblanadi.

“Men bilan bog‘liq mojarolar tufayli oyim qattiq siqildi. O‘zi asablari charchagan edi, yana kuchli zo‘riqish bo‘ldi. Endi salomatliklarini tiklash uchun yaxshi bir sanatoriyga jo‘natish harakatidamiz”, — deydi Alijonova.

Gulsanam bo‘lib o‘tgan ishlardan kerakli xulosa chiqarganligini ta’kidladi.

“Shu bahonada kim qandayligini bilib oldim. Chunki video tarqalib ketganidan so‘ng mendan yuz o‘girgan, ortimdan kulgan, masxaralaganlar bo‘ldi. Endi onam uchun ham hech kim bilan san-manga bormayman, murabbiylarimga quloq solaman. Menga u kishining sog‘lig‘i kerak. Bor e’tiborimni sportga qarataman. Aynan sport barcha orzularim ro‘yobga chiqishiga ko‘maklashadi, deb o‘ylayman”, — deydi Gulsanam.

Eslatib o‘tamiz, 23 yoshli qiz jamoat joyida kalta shortida yurgani uchun yigitlar unga tanbeh bergan. Voqea san-manga borib yetgach qo‘l-oyoqlar ishga tushgan. 8-sentabr kuni Alijonovaga tergov ishi qo‘zg‘atilganligi aytildi. Biroq hodisa jamoatchilik diqqatiga tushib, ko‘pchilik qizni yoqlab chiqdi. Alijonova pandemiya davrida volontyorlik ishlari bilan shug‘ullangani ma’lum bo‘ldi. Saida Mirziyoyeva ham fikrini bildirdi.

Shundan keyin Yoshlar ishlari agentligi viloyat boshqarmasi jinoyat ishi yuzasidan viloyat prokuraturasiga jazoni yengillashtirish bo‘yicha amaliy yordam so‘rab murojaat qildi, Yoshlar ittifoqi esa qizni kafillikka oldi. Shu tariqa taekvondochi qizga qarshi qo‘zg‘atilgan jinoyat ishi tugatilgandi.