Namangan viloyatida yashovchi 24 yoshli ayol OITSga chalinganini bila turib, ogohlantirishlarga qaramasdan bir necha erkaklar bilan ishqiy munosabatda bo‘lib kelgani aniqlandi. Bu haqda Zo‘r TV kanalining “Bu kun” ko‘rsatuvida ma’lum qilindi.
Ma’lum qilinishicha, qiz otasining vafoti, onasining boshqa erkakka turmushga chiqishi oqibatida pulsizlikdan qiynalib, 15 yoshga to‘lar-to‘lmas fohishalik yo‘liga kirgan. Natijada 2020-yil aprel oyida unda OIV infeksiyasi aniqlangan.
Namangan viloyati IIB, Jinoyat-qidiruv boshqarmasi, OIV infeksiyasi tarqalishiga qarshi kurash guruhi va viloyat OITSga qarshi kurash markazi mas’ul xodimlari tomonidan ushbu qiz bilan muntazam profilaktik suhbat olib borilgan. U infeksiyani boshqa shaxslarga yuqtirganligi uchun jinoiy javobgarlik mavjudligi to‘g‘risida ogohlantirilgan bo‘lsa-da, u bunga qaramay bir necha shaxslar bilan ishqiy munosabatda bo‘lib kelgan.
“Onam turmushga chiqib ketgandan so‘ng, uyga borsam tog‘amning ayoli seni oying olib ketgan, endi bu yerda yashamaysan, deb uyga sig‘dirmadi. Mahalla qo‘mitasidagilar seni bolalar uyiga beramiz, deganidan keyin uydan chiqib ketganman.
Shundan keyin 10 kun ko‘chada yotib yurganman. So‘ngra ko‘chada qolib shu yo‘lga kirganman”, – deydi ayol.
OITSga chalingan ayol bundan afsusda ekanini aytib, endi u yaxshi yo‘lga kirmoqchi ekanini ma’lum qilgan.
Ayol qilmishiga chin ko‘ngildan pushaymonligi, o‘zi bilan aloqa qilgan 6 nafar fuqaroda virus alomatlari aniqlanmagani hamda muqaddam jinoyat sodir etmagani sabab unga nisbatan qo‘zg‘atilgan jinoiy ish Jinoyat protsessual kodeksining 84-modda 5-qism 1-bandiga (ishni tergov qilish yoki sudda ko‘rib chiqish paytiga kelib, qilmish ijtimoiy xavflilik xususiyatini yo‘qotgan yoxud vaziyat o‘zgarishi oqibatida bu shaxs ijtimoiy jihatdan xavfli bo‘lmay qolgan jinoyat ishini tugatish) asosan qo‘zg‘atishdan rad etildi.
Avvalroq Sirdaryoda ayol bila turib eriga OITS yuqtirgani, biroq erining da’vosi yo‘qligi bois qamalmagani xabar qilingandi.
Izoh (0)