“Inter”ning 4 futbolchisida koronavirus aniqlandi

“Inter”ning to‘rt nafar futbolchisida COVID-19 koronavirusi aniqlangan, deya xabar beradi La Gazzetta dello Sport.

Manbaga ko‘ra, Milan Shkrinyar, Alessandro Bastoni, Raja Nainggolan va Roberto Gaglyardinining koronavirus infeksiyasi uchun test tahlillari ijobiy natija bergan.

Eslatib o‘tamiz, Italiya A Seriyasining navbatdagi turida “Inter” hamshahari “Milan”ga qarshi bahs olib boradi. Uchrashuv 17-oktabr kuniga belgilangan. “Inter” 3-turdan keyin 7 ochko bilan turnir jadvalida 4-o‘rinni egallab turibdi. Birinchi o‘rinda esa 3 ta uchrashuvdan maksimal ochko (9) jamg‘argan “Atalanta” bormoqda.

Qayd etish joiz, avvalroq o‘zbekistonlik hujumchi Eldor Shomurodovning yangi jamoasi “Jenoa”ning 11 nafar futbolchisida ham koronavirus aniqlangandi.