Oliy Majlis Senat Kengashi Toshkent viloyatidagi ijtimoiy-iqtisodiy holatni o‘rganish bo‘yicha sayyor majlis o‘tkazdi

Toshkent viloyatining investitsiya dasturlari doirasidagi loyihalar holati, yangi ish o‘rinlarini tashkil etish bo‘yicha davlat buyurtmasi ijrosi, mahalliy budjetlarga qo‘shimcha manbalarni jalb qilish va ulardan foydalanish samaradorligini tahlil qilish maqsadida 2020-yil 6-oktabrda Oliy Majlis Senat raisi Tanzila Norboyeva boshchiligidagi sayyor majlis bo‘lib o‘tdi.

Unda Toshkent viloyatining bir qancha sohalarda qilinayotgan ishlari oqsayotgani, amalga oshirilgan ishlar bilan birga ayrim tizimli xato va kamchiliklarga yo‘l qo‘yilganligi tanqid qilindi. Jumladan, Prezident tomonidan qabul qilingan 655 ta normativ-huquqiy hujjatdagi 4 155 ta topshiriqdan 41 tasi o‘z vaqtida va to‘liq bajarilmagan, 30 ta investitsiya kelishuvi ijrosi o‘rganilganda, qiymati 622,4 million dollarlik 14 ta kelishuv ijrosi to‘xtab qolganligi, 339,3 million dollarlik 7 ta kelishuv ijrosi muddatidan kechikkanligi, 450 million dollarlik 5 ta loyiha esa umuman boshlanmaganligi ayon bo‘ldi.

Bundan tashqari, hisobotlarda qo‘shib yozish hisobiga oshirib ko‘rsatish holatlariga yo‘l qo‘yilishi oqibatida mahalliylashtirish dasturi doirasida ishlab chiqarilgan mahsulotlarga o‘xshash mahsulotlar import qilinganligini keltirmoqda “Daryo” muxbiri.

Senat raisi tashkilot va idora rahbarlari tomonidan qilingan xato va kamchiliklari endilikda bitta uzr bilan yopilib ketmasligini aytib o‘tdi. Xususan, “Mahalliy ijro organlari endilikda bitta uzr bilan qutilmaydi. Qaror chiqarishdan oldin mustahkam loyiha tayyorlashni o‘rganishlari va keyingina bir ishga qo‘l urishlari kerak”, – dedi Tanzila Norboyeva.

Majlisda shu va boshqa kamchiliklarning sabablari tahlil qilinib, ularni bartaraf etish bo‘yicha amalga oshirish muddatidan kechikayotgan 10,9 trillion so‘mlik 126 ta hamda amalga oshmay qolayotgan 20,7 trillion so‘mlik 107 ta loyihaning ishga tushirilishini o‘rganish uchun xatlov o‘tkazish reja grafigini ishlab chiqish, shuningdek, istiqbolsiz loyihalarni o‘rindosh loyihalar bilan almashtirish va ularni belgilangan muddatlarda ijro etilishini ta’minlash kabi choralar belgilandi.