Barcha davlat xizmatchilari bosqichma-bosqich deklaratsiya tizimiga o‘tadi. Ushbu amaliyot 5 yil ichida tatbiq etiladi. Tizim 2021-yil yanvardan boshlab joriy qilinadi. Deklaratsiya tizimi bo‘yicha qonun loyihasi tez orada jamoatchilik muhokamasiga qo‘yiladi. Bu haqda Korrupsiyaga qarshi kurashish agentligi direktori Akmal Burhonov agentlikda tashkil etilgan matbuot anjumanida ma’lum qildi.
Maqsadimiz ertami-kechmi, davlat budjetidan oylik pul oladigan barcha davlat xizmatchilari deklaratsiyalanishi kerak. Mol-mulki, xarajatlari, daromadlari. “Davlat fuqarolik xizmati to‘g‘risida”gi qonunni adashtirmaslik kerak. U qonunda, masalan, prokuror yo‘q, administratsiya xodimlari yoki deputatlar yo‘q. Biz bu deklaratsiyaga davlat rahbaridan tortib, hukumat rahbari, sudyalar, prokurorlar, hokimlar, mahalliy hokimiyat idoralari rahbarlari, boshqarma, bo‘lim boshliqlarini bosqichma-bosqich kiritmoqchimiz.Burhonovning aytishicha, agentlik deklaratsiyalash to‘g‘risidagi qonunga fuqarolarning huquqlari va hayotiga daxl qiladigan barcha, eng yuqori darajadagi mansabdor shaxslar nafaqat daromadlari, balki mol-mulk hamda xarajatlarini ham deklaratsiyalashga majburlovchi me’yorlarni kiritish orqali samarali tizimni yo‘lga qo‘yishni rejalashtirmoqda. Bugungi kunda nafaqat qonun loyihasi, balki tizim, monitoring tizimi, deklaratsiyalarni to‘ldirish tizimining onlayn platformasi ustida ish olib borilayotgani ma’lum qilindi.Kimlar deklaratsiyalanishi kerak, qaysi mansabdorlar, ularning nimalarini deklaratsiya qilish kerak, qanday nazorat qilinadi, deklaratsiya noto‘g‘ri to‘ldirilsa, qanday javobgarlik choralari belgilash kerak, qanday huquqiy oqibatlarga olib kelishi va hokazolarning barchasi qonunda aks ettiriladi.
Akmal Burhonov, Korrupsiyaga qarshi kurashish agentligi direktori
Eslatib o‘tamiz, avvalroq 2020-yilning 1-yanvaridan boshlab O‘zbekistonda davlat xizmatchilari ayrim toifalarining mol-mulkini, daromadlari va xarajatlarini deklaratsiyalash tizimini bosqichma-bosqich joriy etish rejalashtirilayotgani aytilgan edi.
Izoh (0)