Тошкент вилоятининг инвестиция дастурлари доирасидаги лойиҳалар ҳолати, янги иш ўринларини ташкил этиш бўйича давлат буюртмаси ижроси, маҳаллий бюджетларга қўшимча манбаларни жалб қилиш ва улардан фойдаланиш самарадорлигини таҳлил қилиш мақсадида 2020 йил 6 октябрда Олий Мажлис Сенат раиси Танзила Норбоева бошчилигидаги сайёр мажлис бўлиб ўтди.
Унда Тошкент вилоятининг бир қанча соҳаларда қилинаётган ишлари оқсаётгани, амалга оширилган ишлар билан бирга айрим тизимли хато ва камчиликларга йўл қўйилганлиги танқид қилинди. Жумладан, Президент томонидан қабул қилинган 655 та норматив-ҳуқуқий ҳужжатдаги 4 155 та топшириқдан 41 таси ўз вақтида ва тўлиқ бажарилмаган, 30 та инвестиция келишуви ижроси ўрганилганда, қиймати 622,4 миллион долларлик 14 та келишув ижроси тўхтаб қолганлиги, 339,3 миллион долларлик 7 та келишув ижроси муддатидан кечикканлиги, 450 миллион долларлик 5 та лойиҳа эса умуман бошланмаганлиги аён бўлди.
Бундан ташқари, ҳисоботларда қўшиб ёзиш ҳисобига ошириб кўрсатиш ҳолатларига йўл қўйилиши оқибатида маҳаллийлаштириш дастури доирасида ишлаб чиқарилган маҳсулотларга ўхшаш маҳсулотлар импорт қилинганлигини келтирмоқда «Дарё» мухбири.
Сенат раиси ташкилот ва идора раҳбарлари томонидан қилинган хато ва камчиликлари эндиликда битта узр билан ёпилиб кетмаслигини айтиб ўтди. Хусусан, «Маҳаллий ижро органлари эндиликда битта узр билан қутилмайди. Қарор чиқаришдан олдин мустаҳкам лойиҳа тайёрлашни ўрганишлари ва кейингина бир ишга қўл уришлари керак», – деди Танзила Норбоева.
Мажлисда шу ва бошқа камчиликларнинг сабаблари таҳлил қилиниб, уларни бартараф этиш бўйича амалга ошириш муддатидан кечикаётган 10,9 триллион сўмлик 126 та ҳамда амалга ошмай қолаётган 20,7 триллион сўмлик 107 та лойиҳанинг ишга туширилишини ўрганиш учун хатлов ўтказиш режа графигини ишлаб чиқиш, шунингдек, истиқболсиз лойиҳаларни ўриндош лойиҳалар билан алмаштириш ва уларни белгиланган муддатларда ижро этилишини таъминлаш каби чоралар белгиланди.
Мавзуга доир:
Изоҳ (0)