Moskvada sutka davomida 4082 kishi COVID-19’ga chalingani aniqlandi, deb xabar bermoqda “RBK”, Koronavirusga qarshi tezkor shtabning 6-oktabrdagi ma’lumotlariga tayanib.
Xabarda aytilishicha, kunlik kasallanish soni 4 ming kishidan ortiq bo‘lgan holat shaharda oxirgi marta 15-may kuni qayd etilgan. O‘sha kuni 4748 kishida koronavirus aniqlangan.
Poytaxtda kasallanishlar sonining ortishi sentabr oyi oxirlaridan buyon kuzatilmoqda: 24-sentabrda 1 mingdan ortiq kasallanganlar qayd etilgan, 23-sentabrda esa ular soni 1,5 ming nafarni tashkil etgan.
Parallel ravishda sog‘ayganlar soni ham ortib bormoqda. Ijtimoiy rivojlanish bo‘yicha mer o‘rinbosari Anastasiya Rakovaning aytishicha, o‘tgan sutka davomida 1156 nafar bemor sog‘aygan. Shuningdek, 31 kishi vafot etgan.
Koronavirus bilan kasallanish holati ortganligi fonida Moskva hukumati keksalarni uyda qolishga, ish beruvchilarni esa xodimlarini masofadan ishlashga o‘tkazishga chaqirdi. Moskva tibbiyot universiteti talabalari va bitiruvchilariga poytaxt kasalxonalarida ishlash taklif qilindi. Maktab o‘quvchilari 5-oktabrdan 18-oktabrgacha ikki haftalik ta’tilga chiqdi.
Izoh (0)