Koronavirusga chalingan AQSh prezidenti Donald Trampga harbiy gospitaldan javob berildi, deya xabar qiladi “RBK” Bloomberg’ga tayanib.
Prezident kasalxona binosidan qo‘riqchilari hamrohligida chiqqan, u tibbiy niqobda bo‘lgan. Tramp tibbiy muassasa binosi yonida to‘plangan jurnalistlarning savollariga javob bermagan.
AQSh prezidenti kasalxonadan Oq uyga vertolyotda yo‘l olgan. Ammo qarorgohga yetib kelgach, zinadan ko‘tarilib, “noodatiy yo‘nalish” bilan binoga kirgan, deb xabar bermoqda CNN telekanali. Balkonda u niqobini yechib, muxbirlarga ko‘rinish bergan.
Keyinroq Tramp Twitter’ida amerikaliklarga videomurojaat yo‘llagan. Davlat rahbari ularni koronavirusdan qo‘rqmaslikka chaqirgan.
— Donald J. Trump (@realDonaldTrump) October 5, 2020
“U hayotingizni boshqarishiga yo‘l qo‘ymang. Biz uni yengamiz. Bizda eng yaxshi tibbiy uskunalar, eng yaxshi dorilar bor, bularning barchasi yaqinda ishlab chiqildi”, — degan Tramp. Shuningdek, prezident COVID-19’ga qarshi vaksina tez orada paydo bo‘lishini va’da qilgan.
Bundan tashqari, AQSh rahbari videomurojaatda o‘z ahvoli haqida ham aytib o‘tdi. Uning so‘zlariga ko‘ra, u kasalxonadan ikki kun avval ham chiqib keta olgan bo‘lardi: o‘shandayoq u o‘zini ancha yaxshi his qilgan. “Bilaman, xavf bor, ammo bu normal holat. Ahvolim ancha yaxshi. Balki, menda immunitet bordir”, — degan u.
Eslatib o‘tamiz, Donald Tramp va uning rafiqasi Melaniyaning 2-oktabr kuni koronavirusga topshirgan testi ijobiy chiqqan. So‘ng u Uolter Rid nomidagi milliy harbiy tibbiyot markazida davolandi.
Avvalroq AQSh prezidenti Donald Tramp o‘z tarafdorlari bilan uchrashish uchun biroz vaqtga shifoxonani tark etgani xabar berilgan edi. Shuningdek, AQSh prezidenti Donald Tramp koronavirusga topshirgan birinchi testining javobi ijobiy chiqqanini yashirgani ma’lum bo‘lgandi.
Izoh (0)