Futbol bo‘yicha Rossiya Premyer Ligasining 10-turida “Spartak” 3-oktabr, shanba kuni “Zenit”ga qarshi bahs olib bordi.
Uchrashuvning birinchi bo‘limi amaldagi chempionning ustunligida kechdi. Tanaffusdan keyin moskvaliklar ham faollikni oshirdi. “Spartak” raqib jarima maydoni atrofida bosimni oshirayotgan bir vaqtda “Zenit” vakillari hisobni ochishga muvaffaq bo‘ldi. 65-daqiqada himoyadan chiqishda xatoga yo‘l qo‘ygan poytaxtliklar o‘z darvozasidan to‘p olib chiqdi: Artyom Dzyubaning uzatmasini Aleksandr Yeroxin golga aylantirdi.
Goldan keyin piterliklar ma’lum vaqt davomida vaziyatni nazorat qildi. Biroq o‘yin yakunlanishi arafasida “Spartak” yana bosimni kuchaytirdi. Natijada 86-daqiqada Esekel Ponse hisobni tenglashtirishga erishdi.
O‘zbekistonlik yarim himoyachi Oston O‘runov mazkur bahsda asosiy tarkibda maydonga tushdi va 85-daqiqada zaxiraga olindi.
“Zenit” va “Spartak” 21 ochkodan to‘plagan holda musobaqa jadvalida yetakchilik qilmoqda. “Qizil-oqlar” keyingi turda “Ximki” maydonida mehmon bo‘lsa, “Zenit” o‘z uyida “Sochi”ni qabul qiladi.
RPL
10-tur bahsi
3-oktabr, shanba
“Spartak” — “Zenit” 1:1
Gollar: 0:1 – 65 Yeroxin, 1:1 – 86 Ponse.“Spartak”: Maksimenko, Jikiya, Jigo, Maslov, Ayrton, Zobnin, O‘runov (Yeshenko, 85), Kral, Bakayev (Sobolyev, 53), Larsson (Markitesov, 90), Ponse.
“Zenit”: Kerjakov, Karavayev, Duglas Santos, Lovren, Rakitskiy, Ozdoyev (Sutormin, 90), Yeroxin, Mostovoy (Azmun, 72), Barrios, Malkom (Krugovoy, 90), Dzyuba.
Ogohlantirishlar: Duglas Santos (37), Sobolyev (59), Barrios (88), Lovren (89), Yeshenko (90).
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)