Тошкент вилоятида қиймати 91,5 млн сўмлик қўчқорларни ўғирлаган шахс қўлга олинди

Тошкент вилоятида 61 та қўчқорни ва 5 қоп емни ўғирлаган шахс ушланди, деб хабар бермоқда Тергов департаменти.

Маълум қилинишича, 2020 йилнинг 28 июндан 15 июль кунига қадар бўлган вақт мобайнида 45 ёшли З.М. 28 ёшли А.Б. билан ўзаро олдиндан жиноий тил бириктирган. Улар ўзи ёлланма ишчи сифатида ишлаётган 38 ёшли Н.Т.нинг Бўстонлиқ тумани Хондойлиқ қишлоғида жойлашган фермер хўжалигига қарашли яйлов ер майдонидан, эркин ҳолатда ўтлаб юрган жами баҳоси 91 500 000 сўмлик 61 бош қўчқорларни ва нархи 750 000 сўм бўлган 5 қоп емни яширин равишда ўғирлаб кетган.

Олиб борилган тезкор қидирув ҳаракатлари натижасида, З.М. ва А.Б. мазкур жиноятни содир этганликлари аниқланиб, процессуал тартибда ушланган.

Мазкур ҳолат юзасидан Бўстонлиқ тумани ИИБ ҳузуридаги Тергов бўлими томонидан Жиноят кодексининг 169-моддаси 3-қисми «в» банди (ўғрилик) билан жиноят иши қўзғатилган. Ўғирланган 61 бош қўчқор ашёвий далил тариқасида олинган. Хабарда нархи 750 000 сўм бўлган 5 қоп ем ҳақида ҳеч қандай маълумот берилмаган.

Жиноят иши юзасидан З.М. ва А.Б. айбланувчи тариқасида жалб қилиниб, уларга нисбатан «қамоққа олиш» тарзидаги эҳтиёт чораси қўлланилган.

Дастлабки тергов ҳаракатлари давом эттирилмоқда.