Qamchiq dovonida yangi tunnel qurish bo‘yicha tender e’lon qilinadi, deb xabar bermoqda Prezident matbuot xizmati. Bu haqda 5-avgust kuni Shavkat Mirziyoyev raisligida o‘tkazilgan yig‘ilishdа ma’lum qilingan.
Yig‘ilishda energetika, transport, kommunal xo‘jalik va tibbiyot sohalarida davlat-xususiy sheriklikni kengaytirish masalasi ko‘rib chiqilgan. Transport va logistika tarmog‘i haqida gap ketganda ushbu sohada amalga oshirilayotgan ishlar umuman qoniqarli emasligi qayd etilgan.
Ma’lum qilinishicha, ushbu sohani rivojlantirishning keyingi davrida 27 milliard dollar talab etiladi.
“Misol uchun, bugungi kunda Qamchiq dovoni orqali Toshkentdan Andijonga borish uchun tirbandliklar sababli 5-6 soat vaqt sarflanadi, 22 ming avtomobil o‘tadi. Bu ko‘rsatkich kelgusi 5 yilda 40 mingga yetadi. Toshkent—Andijon pullik avtomobil yo‘li ishga tushgan taqdirda masofani bosib o‘tish 3 soatgacha qisqaradi, transport harakati esa 70 foizgacha oshadi.
Shu bois davlatimiz rahbari Qamchiq dovonida yangi tunnel qurish bo‘yicha tender-loyiha hujjatlarini ishlab chiqish va tender e’lon qilish muhimligini ko‘rsatib o‘tdi”, — deyiladi xabarda.
Avvalroq Toshkent, Buxoro, Farg‘ona va Urganch aeroportlari davlat-xususiy sheriklikka berilishi, bu borada Prezident texnik topshiriqlar ishlab chiqish vazifasini topshirgani xabar berilgan edi.
Izoh (0)