Қамчиқ довонида янги туннел қуриш бўйича тендер эълон қилинади, деб хабар бермоқда Президент матбуот хизмати. Бу ҳақда 5 август куни Шавкат Мирзиёев раислигида ўтказилган йиғилишда маълум қилинган.
Йиғилишда энергетика, транспорт, коммунал хўжалик ва тиббиёт соҳаларида давлат-хусусий шерикликни кенгайтириш масаласи кўриб чиқилган. Транспорт ва логистика тармоғи ҳақида гап кетганда ушбу соҳада амалга оширилаётган ишлар умуман қониқарли эмаслиги қайд этилган.
Маълум қилинишича, ушбу соҳани ривожлантиришнинг кейинги даврида 27 миллиард доллар талаб этилади.
«Мисол учун, бугунги кунда Қамчиқ довони орқали Тошкентдан Андижонга бориш учун тирбандликлар сабабли 5-6 соат вақт сарфланади, 22 минг автомобиль ўтади. Бу кўрсаткич келгуси 5 йилда 40 мингга етади. Тошкент—Андижон пуллик автомобиль йўли ишга тушган тақдирда масофани босиб ўтиш 3 соатгача қисқаради, транспорт ҳаракати эса 70 фоизгача ошади.
Шу боис давлатимиз раҳбари Қамчиқ довонида янги туннел қуриш бўйича тендер-лойиҳа ҳужжатларини ишлаб чиқиш ва тендер эълон қилиш муҳимлигини кўрсатиб ўтди», — дейилади хабарда.
Аввалроқ Тошкент, Бухоро, Фарғона ва Урганч аэропортлари давлат-хусусий шерикликка берилиши, бу борада Президент техник топшириқлар ишлаб чиқиш вазифасини топширгани хабар берилган эди.
Изоҳ (0)