O‘zbekistonda Koreya va Yevropaga ishga yuborishni va’da qilib, fuqarolarning 5,6 milliard so‘m pulini o‘zlashtirgan International Job Organization xususiy bandlik agentligi rahbari qamoqqa olindi. Bu haqda IIV Tergov departamenti xabar berdi.
Aniqlanishicha, 1993-yil Qirg‘izistonda tug‘ilgan, fuqaroligi bo‘lmagan shaxs Sh.A. Toshkent shahar, Yunusobod tumani, Ahmad Donish ko‘chasi, 2-mavzeda joylashgan faoliyat turiga ko‘ra O‘zbekistondan tashqarida ish izlovchi fuqarolarni xorijiy davlatda ishga joylashtirish, bo‘sh ish o‘rinlari haqida ma’lumotlar berish hisoblangan International Job Organization xususiy bandlik agentligi uchun 2019-yilning 19-aprel kuni Bandlik va mehnat munosabatlari vazirligidan litsenziya olib, jamiyatga rahbarlik qilib kelgan.
Jamiyat tashkil topgan kundan bugungi kunga qadar firibgarlik yo‘li bilan o‘zgalarning mulkini qo‘lga kiritishni maqsad qilib, respublikaning barcha viloyatlarida vakolatxona ochgan. Turli OAV orqali jamiyat haqida e’lonlar berib, bosh ofis va vakolatxonaga ishga joylashish bo‘yicha murojaat qilib kelgan fuqarolarni Janubiy Koreya va Yevropa davlatlariga ishga yuborishini va’da qilgan.
Ularga Tashqi mehnat migratsiyasi agentligidan olgan litsenziyasini, Polshada faoliyat ko‘rsatib kelayotgan APEX Sp.z.o.o va WIN SOLUTION Sp.z.o.o korxonalari bilan tuzilgan O‘zbekiston fuqarolarini ishga joylashtirish to‘g‘risidagi memorandumni ko‘rsatish orqali fuqarolar ishonchiga kirgan.
Taklif etilgan davlatdagi ishdan kelib chiqqan holda dastlabki tergov davomida aniqlangan 132 nafar fuqarodan 45 million so‘mgacha bo‘lgan miqdordagi pullarni agentlikning bank hisob raqamiga kirim qilish yo‘li bilan qo‘lga kiritgan. Ulardan hech birini xorijiy davlatga ishga yubormasdan, pullarni shaxsiy ehtiyojlari va jamiyatning faoliyati uchun maqsadsiz sarflab, davomli jinoiy harakatlari bilan 5,6 milliard so‘mni o‘zlashtirgan.
Mazkur holat yuzasidan Bosh prokuratura huzuridagi Iqtisodiy jinoyatlarga qarshi kurashish departamenti Surxondaryo viloyat boshqarmasi tomonidan International Job Organization xususiy bandlik agentligi direktori Sh.A. va boshqalarga nisbatan Jinoyat kodeksining 168-moddasi 4-qismi “a” bandi bilan jinoyat ishi qo‘zg‘atilgan.
10-iyun kuni Sh.A. jinoyat ishida Jinoyat kodeksining 168-moddasi 4-qismi “a” bandida ko‘rsatilgan jinoyatni sodir etganlikda gumon qilinuvchi tariqasida ishtirok etishga jalb qilingan. 26-iyunda jinoyat ishi IIV huzuridagi Tergov departamenti ish yurituviga olingan va MChJning bosh ofisida tintuv tergov harakati o‘tkazilgan. Tintuv davomida bir qator buyumlar ashyoviy dalil sifatida rasmiylashtirib olingan.
Jinoyat ishini tergov qilish jarayonida Sh.A. Jinoyat kodeksining 168-moddasi 4-qismi “a” bandida ko‘rsatilgan jinoyat (Juda ko‘p miqdorda firibgarlik)ni sodir etganlikda ayblanuvchi tariqasida ishtirok etishga jalb qilinib, unga nisbatan qamoqqa olish tarzidagi ehtiyot chorasi qo‘llanilgan.
Bugungi kunga qadar MChJ tomonidan birorta ham fuqaro O‘zbekistondan tashqarida ishga joylashtirilmagan.
IIV huzuridagi Tergov departamenti tomonidan barcha viloyat IIB huzuridagi tergov boshqarmalariga tergov topshiriqlari yuborilgan bo‘lib, ushbu topshiriqqa asosan fuqarolar so‘roq qilib bo‘linganidan so‘ng yetkazilgan zararning aniq miqdori ma’lum bo‘ladi (yetkazilgan zararning jami miqdori hozirgi mavjud zarardan oshishi kutilmoqda).
Ta’kidlanishicha, hozirgi kunda dastlabki tergov harakatlari davom etmoqda, tergov harakatlari va jinoyat ishi natijasi yuzasidan qo‘shimcha ravishda axborot berib borilishi ta’minlanadi.
Eslatib o‘tamiz, O‘zbekistonda bir qator xususiy bandlik agentliklari mansabdorlari ustidan jinoyat ishlari ochilgach, hukumat tomonidan mamlakatdagi barcha xususiy bandlik agentliklarini tugatish bo‘yicha Prezidentga taklif kiritilishi ma’lum qilingandi.
Izoh (0)