Tojikiston elektr energiyasini eksport qilishdan tushgan umumiy miqdor 40 million dollarni tashkil etdi. Bu haqda Asia-Plus ma’lum qildi.
Qayd etilishicha, Tojikiston elektr energiyasini eksport qilish o‘tgan yilga nisbatan 324,9 million kilovatt/soatga kamaydi.
“Nurek GESiga suv oqimining pasayishi tufayli eksport qilinayotgan elektr energiyasi hajmi ham kamaydi”, — dedi “Barki Tojik” OAJ rahbari Mirzo Ismoilzoda jurnalistlar bilan uchrashuvda.
Uning so‘zlariga ko‘ra, olti oy ichida Afg‘onistonga 546,6 million kilovatt/soat, O‘zbekistonga esa 358,3 million kilovatt/soat elektr energiyasi eksport qilingan.
“Avval Afg‘onistonga har kuni 320 megavatt elektr energiyasi eksport qilingan bo‘lsa, bugungi kunda bu ko‘rsatkich 40 megavattga kamaygan. O‘zbekistonga ham elektr energiyasi eksporti pasaygan. Umuman olganda, 2020-yilning olti oyi davomida elektr energiyasi eksporti o‘tgan yilga nisbatan 324,9 million kilovatt/soatga kamaygan. Bu Vaxsh daryosida suv oqimining pasayishi va Afg‘onistonda tarmoqlarni qayta taqsimlanishi bilan bog‘liq”, – dedi Mirzo Ismoilzoda.
“Barki Tojik” kompaniyasi ma’lumotlariga ko‘ra, hisobot davrida elektr energiyasini eksport qilishdan tushgan umumiy mablag‘ 40 million dollarni tashkil etdi. 23 million AQSh dollaridan ortiq elektr energiyasi Afg‘onistonga, 7,2 million dollardan ortiq miqdordagi elektr energiyasi esa O‘zbekistonga to‘g‘ri keladi.
“So‘nggi uch oy ichida Vaxsh daryosidagi suv oqimi deyarli 30 foizga kamaydi, shuning uchun Nurek GESiga keladigan suv oqimi ham pasayib ketdi. So‘nggi ikki kun ichida Vaxshda suv sathi ko‘tarildi, bu elektr energiyasini eksport qilish hajmini oshirishga xizmat qiladi. Umid qilamizki, kuzda Nurekdagi suv sathi eng yuqori ko‘rsatkichga – 910 metrga yetadi va biz to‘laqonli ishlashga o‘tamiz”, – deyiladi kompaniya xabarida.
Eslatib o‘tamiz, 21-iyul kunidan boshlab O‘zbekiston bo‘ylab elektr energiyasi iste’molchilariga cheklovlar kiritilgani ma’lum qilingan edi. Shuningdek, respublika bo‘ylab vaqtinchalik elektr ta’minotidagi uzilishlariga Tojikistondan qabul qilinayotgan elektr energiyasi importi hajmining keskin qisqarishi ham sabab bo‘lgani aytilgan.
Izoh (0)