Тожикистон Афғонистон ва Ўзбекистонга 40 млн долларлик электр энергиясини сотгани маълум қилинди

Тожикистон электр энергиясини экспорт қилишдан тушган умумий миқдор 40 миллион долларни ташкил этди. Бу ҳақда Asia-Plus маълум қилди.

Қайд этилишича, Тожикистон электр энергиясини экспорт қилиш ўтган йилга нисбатан 324,9 миллион киловатт/соатга камайди.

«Нурек ГЭСига сув оқимининг пасайиши туфайли экспорт қилинаётган электр энергияси ҳажми ҳам камайди», — деди «Барки Тожик» ОАЖ раҳбари Мирзо Исмоилзода журналистлар билан учрашувда.

Унинг сўзларига кўра, олти ой ичида Афғонистонга 546,6 миллион киловатт/соат, Ўзбекистонга эса 358,3 миллион киловатт/соат электр энергияси экспорт қилинган.

«Аввал Афғонистонга ҳар куни 320 мегаватт электр энергияси экспорт қилинган бўлса, бугунги кунда бу кўрсаткич 40 мегаваттга камайган. Ўзбекистонга ҳам электр энергияси экспорти пасайган. Умуман олганда, 2020 йилнинг олти ойи давомида электр энергияси экспорти ўтган йилга нисбатан 324,9 миллион киловатт/соатга камайган. Бу Вахш дарёсида сув оқимининг пасайиши ва Афғонистонда тармоқларни қайта тақсимланиши билан боғлиқ», – деди Мирзо Исмоилзода.

«Барки Тожик» компанияси маълумотларига кўра, ҳисобот даврида электр энергиясини экспорт қилишдан тушган умумий маблағ 40 миллион долларни ташкил этди. 23 миллион АҚШ долларидан ортиқ электр энергияси Афғонистонга, 7,2 миллион доллардан ортиқ миқдордаги электр энергияси эса Ўзбекистонга тўғри келади.

«Сўнгги уч ой ичида Вахш дарёсидаги сув оқими деярли 30 фоизга камайди, шунинг учун Нурек ГЭСига келадиган сув оқими ҳам пасайиб кетди. Сўнгги икки кун ичида Вахшда сув сатҳи кўтарилди, бу электр энергиясини экспорт қилиш ҳажмини оширишга хизмат қилади. Умид қиламизки, кузда Нурекдаги сув сатҳи энг юқори кўрсаткичга – 910 метрга етади ва биз тўлақонли ишлашга ўтамиз», – дейилади компания хабарида.

Эслатиб ўтамиз, 21 июль кунидан бошлаб Ўзбекистон бўйлаб электр энергияси истеъмолчиларига чекловлар киритилгани маълум қилинган эди. Шунингдек, республика бўйлаб вақтинчалик электр таъминотидаги узилишларига Тожикистондан қабул қилинаётган электр энергияси импорти ҳажмининг кескин қисқариши ҳам сабаб бўлгани айтилган.