Sog‘liqni saqlash vazirligi bosh infeksionisti Erkin Musaboyev O‘zbekistonda koronavirus emas, balki o‘lat tarqalgani haqidagi mish-mishlar mutlaqo asossiz ekanligini ma’lum qildi. Bu haqda “Kun.uz” xabar bermoqda.
So‘nggi kunlarda ijtimoiy tarmoqlar, xususan, Telegram’dagi ko‘plab guruhlarda O‘zbekistonda COVID-19 kasalligi emas, o‘lat avj olayotgani haqida gap-so‘zlar tarqaldi. Erkin Musaboyevning so‘zlariga ko‘ra, bu xabarlar butkul asossiz.
Uning aytishicha, mamlakatda o‘latga chalinish bilan bog‘liq so‘nggi holat 1996-yilda qayd etilgan bo‘lib, shundan buyon biror marta kuzatilmagan.
“O‘lat (chuma) juda qo‘rqinchli holat hisoblanadi. Bir necha asrlar avval kuzatilgan bu kasallik juda ko‘p o‘limlarga olib kelgan. O‘lat – antroponoz kasallik, ya’ni uning tarqalishi uchun tabiiy o‘choq kerak. Bu tabiiy o‘choq cho‘l zonalarida bo‘lishi mumkin. Uning tarqatuvchilari kemiruvchilar – kalamush, burga kabilar bo‘ladi. Ular mikrob tarqatib, odamlarga ham yuqtiradi.
O‘zbekistonda kemiruvchilarni nazorat qiluvchi karantin stansiyalari mavjud. Kemiruvchilar ko‘payib ketgan taqdirda ularni tekshirishadi va kamaytirishadi.
O‘zbekistonda odamlarda 1996-yilda o‘lat kuzatilgan, shundan beri o‘tgan 24 yil ichida kuzatilgani yo‘q. O‘latning o‘chog‘i cho‘l zonasida. Koronavirus esa ko‘rib turganimizdek, shahar zonalarida – aholi konsentratsiyasi yuqori bo‘lgan hududlarda keng tarqalmoqda”, – dedi Sog‘liqni saqlash vazirligi rasmiysi 22-iyul kuni “Tez yordam” dasturida.
Eslatib o‘tamiz, Sog‘liqni saqlash vazirligi piyoz koronavirusni o‘ldirishi haqidagi xabarlarni safsata deb atagan, “doka niqob spirt bilan namlab taqib yurilsa, koronavirus yuqmaydi” mazmunidagi gap-so‘zlar asossizligi, Bosh davlat sanitariya inspektori sarimsoqpiyoz ham antibakterial, ham antivirus preparat emasligini bildirilgan edi.
“Tez yordam” ko‘rsatuvining avvalgi sonida gidroksixloroxin preparatining koronavirus infeksiyasini davolashdagi zararli oqibatlari haqida ma’lumot berilgandi.
Izoh (0)