Toshkent shahar ichki ishlar bosh boshqarmasi 21-iyul kuni Toshkent shahri Chilonzor tumanida kuzatilgan yoshlarning janjali yuzasidan tafsilotlarni ma’lum qildi.
Boshqarma xabari bo‘yicha 21-iyul kuni soat 14:30 da 102 raqamiga Chilonzor tumanining 3-mavzesidagi Cho‘ponota ko‘chasida AQShning O‘zbekistondagi elchixonasi sobiq binosining yaqinida o‘ndan ortiq yoshlar janjallashayotgani aniqlangan.
Hodisa joyiga Toshkent shahar IIBB PPX brigadasi 4-batalyoni xodimlari yetib borgan. Patrul avtomobilini ko‘rgan yoshlarning bir nechtasi qochib ketgan, yetti nafari qo‘lga olingan.
Gumonlanuvchilar eng yaqin ichki ishlar bo‘limiga olib kelingan. Qo‘lga olinganlardan biri – muqaddam sudlangan 28 yoshli E.Sh. tekshirilganda uning avtomobili salonidan uchta pichoq, barsetkasidan esa 3 flakon “Tropikamid”, 1 flakon “Rinoksil”, 6 ta “Selofen” dorilari topilgan.
Chilonzor tumani IIO FMB 4-son ichki ishlar bo‘limi tomonidan tekshiruv o‘tkazilmoqda. Tekshiruv davomida hodisaning boshqa ishtirokchilarining shaxslari aniqlanib, so‘ng barcha ishtirokchilarning xatti-harakatlariga huquqiy baho beriladi, deyilgan Toshkent shahar IIBB xabarida.
Avval Toshkent shahrida 16 yoshli yo‘lovchining iPhone X telefonini olib qo‘yib, o‘zini ko‘chada qoldirib ketgan haydovchining qo‘lga tushgani, Toshkent shahar Olmazor tumanidagi bilyardxonada tungi vaqtda janjal keltirib chiqargan shaxslarga jinoiy ish ochilgani, Toshkentning Sergeli tumanida joylashgan Yangi Choshtepa dahasida olib borilayotgan qurilish ishlari hududida quruvchilar o‘rtasida ommaviy mushtlashuvda ishtirok etgan besh nafar quruvchi 10 sutkaga qamalgani haqida xabarlar berilgan.
Izoh (0)