Соғлиқни сақлаш вазирлиги бош инфекционисти Эркин Мусабоев Ўзбекистонда коронавирус эмас, балки ўлат тарқалгани ҳақидаги миш-мишлар мутлақо асоссиз эканлигини маълум қилди. Бу ҳақда «Kun.uz» хабар бермоқда.
Сўнгги кунларда ижтимоий тармоқлар, хусусан, Telegram’даги кўплаб гуруҳларда Ўзбекистонда COVID-19 касаллиги эмас, ўлат авж олаётгани ҳақида гап-сўзлар тарқалди. Эркин Мусабоевнинг сўзларига кўра, бу хабарлар буткул асоссиз.
Унинг айтишича, мамлакатда ўлатга чалиниш билан боғлиқ сўнгги ҳолат 1996 йилда қайд этилган бўлиб, шундан буён бирор марта кузатилмаган.
«Ўлат (чума) жуда қўрқинчли ҳолат ҳисобланади. Бир неча асрлар аввал кузатилган бу касаллик жуда кўп ўлимларга олиб келган. Ўлат – антропоноз касаллик, яъни унинг тарқалиши учун табиий ўчоқ керак. Бу табиий ўчоқ чўл зоналарида бўлиши мумкин. Унинг тарқатувчилари кемирувчилар – каламуш, бурга кабилар бўлади. Улар микроб тарқатиб, одамларга ҳам юқтиради.
Ўзбекистонда кемирувчиларни назорат қилувчи карантин станциялари мавжуд. Кемирувчилар кўпайиб кетган тақдирда уларни текширишади ва камайтиришади.
Ўзбекистонда одамларда 1996 йилда ўлат кузатилган, шундан бери ўтган 24 йил ичида кузатилгани йўқ. Ўлатнинг ўчоғи чўл зонасида. Коронавирус эса кўриб турганимиздек, шаҳар зоналарида – аҳоли концентрацияси юқори бўлган ҳудудларда кенг тарқалмоқда», – деди Соғлиқни сақлаш вазирлиги расмийси 22 июль куни «Тез ёрдам» дастурида.
Эслатиб ўтамиз, Соғлиқни сақлаш вазирлиги пиёз коронавирусни ўлдириши ҳақидаги хабарларни сафсата деб атаган, «дока ниқоб спирт билан намлаб тақиб юрилса, коронавирус юқмайди» мазмунидаги гап-сўзлар асоссизлиги, Бош давлат санитария инспектори саримсоқпиёз ҳам антибактериал, ҳам антивирус препарат эмаслигини билдирилган эди.
«Тез ёрдам» кўрсатувининг аввалги сонида гидроксихлорохин препаратининг коронавирус инфекциясини даволашдаги зарарли оқибатлари ҳақида маълумот берилганди.
Изоҳ (0)