Андижон вилояти ҳокими Шуҳрат Абдураҳмонов Хўжаобод туманидаги «Дўстлик» чегара пости орқали Қирғизистондан вилоятга ҳар куни 100 нафардан 500 нафаргача фуқаро олиб ўтилаётганини, ҳудуддаги касалланганларнинг ярми шу чегарадан ўтган фуқаролар эканлигини маълум қилди. Бу ҳақда Шуҳрат Абдураҳмонов иштирокидаги брифингда қатнашган «Дарё» мухбири хабар берди.
Андижон вилояти ҳокими 20 июль куни вилоят аҳлига мурожаат қилиб, коронавирус дунё халқлари қатори ўзбекистонликларни ҳам жиддий ташвишга солаётганини, аммо касалликка қарши тизимли ишлар бошлангани боис, хавотирга ўрин йўқлигини, вазият тўлиқ назоратга олинганлигини билдирган.
Вилоят ҳокимининг мурожаатномасида ҳудуддаги умумий касалланганларнинг деярли ярми Қирғизистон билан чегарадаги «Дўстлик» пости орқали ўтган Ўзбекистон фуқаролари эканлиги таъкидланган.
«Коронавирус балоси Ўзбекистонга келганидан бери Андижон вилоятида 738 нафар фуқарода касаллик аниқланди. Касалланганларнинг 363 нафари ‘Дўстлик’ чегарасидан ўтган турли вилоят фуқаролари эканлиги ва бу умумий касалланганлар сонининг 50 фоизини ташкил этиши аниқланган. Шунга қарамасдан чегарада турган юртдошларимизнинг барчасини олиб ўтяпмиз, бундан кейин ҳам олиб ўтишда давом этамиз. Лекин бир нарсани тушунишингизни истардимки, юртимизга олиб кирилаётган фуқароларга аввало шароитини яратиб, ётоқ жойини, дори-дармонини, озиқ-овқатини ҳал қилганимиздан сўнг олиб ўтамиз», — деди вилоят раҳбари.
Вилоят раҳбарининг таъкидлашича, коронавирусдан даволанаётган 313 нафар беморнинг 2 нафари оғир, 6 нафари ўрта оғир аҳволда. Қолган 306 нафарининг аҳволи эса қониқарли.
«Вилоятимизда 2020 йил 16 мартдан бошлаб шу кунга қадар коронавирус хасталигига чалинганларнинг 425 нафари соғайди. 313 нафари даволанмоқда. Уларнинг 117 нафари вилоят юқумли касалликлар шифохонасида даволанаётган бўлса, 196 нафари уй шароитида белгиланган муолажаларни олмоқда. Шунга мувофиқ мобил тиббиёт гуруҳлари ташкил этилиб, хонадонларга бириктирилган. Хонадонлар олдида Миллий гвардия ходимларидан иборат постлар ҳам ташкил қилинган», — дейди Андижон вилояти ҳокими.
Маълумот учун, Шуҳрат Абдураҳмонов 20 июль кунидаги брифингда Андижон вилоятида коронавирусга чалинган фуқаролар 738 нафар эканлигини билдирган. Аммо ССВнинг 20 июль соат 23:30 даги жадвали бўйича вилоятда касаллик аниқланган фуқаролар сони 682 нафарни ташкил этаётганини кўриш мумкин.
Андижон вилоятида коронавирусга чалинганлар сони ССВ маълумотлари бўйича 21 июлга келибгина 700 нафардан ошди. Ҳозирда касаллик қайд этилганлар сони вилоятда 793 нафарга етди.
Эслатиб ўтамиз, Эркинжон Турдимовнинг 10 июлдаги мурожаатидан сўнг ҳам Самарқанд вилоятида коронавирус билан касалланиш ҳолатлари ССВ берган маълумотлардан кўпроқлиги маълум бўлганди.
Мавзуга доир:
- Шуҳрат Абдураҳмонов: Андижонда 9 млрд сўмлик дори-дармон захираси яратилган
- Зоир Мирзаев: «Қашқадарёда коронавирусдан даволанаётган 75 нафар бемор 6 та сектор раҳбари назоратида»
- Бухорода коронавирусга чалинганлар 633 нафарга, вафот этганлар эса 4 нафарга етди
- «Уйда карантинга олинганларга хизмат кўрсатиш учун 354 нафар шифокор, 1454 нафар патронаж ҳамшира жалб қилинган». Навоий вилояти ҳокими ҳудуддаги вазият ҳақида хабар берди
Изоҳ (0)