Surxondaryo, Jizzax va Toshkent viloyatlarida turli jinoyatlarni sodir etganligi uchun qidiruvga berilgan shaxslar Toshkent shahrida qo‘lga olindi. Bu haqda Ichki ishlar vazirligi matbuot xizmati xabar berdi.
Xususan, Jinoyat kodeksining 169-moddasida (O‘g‘rilik) nazarda tutilgan jinoyatni sodir etganligi uchun qidiruv e’lon qilingan jizzaxlik 27 yoshli Dilshod A. 15-iyul kuni Mirobod tumani IIO FMB xodimlari tomonidan Qo‘yliq bozori hududida qo‘lga olindi.
Yakkasaroy tumani IIO FMB xodimlari 17-iyul kuni Jinoyat kodeksining 168-moddasida (Firibgarlik) nazarda tutilgan jinoyatni sodir etganligi uchun qidiruvga berilgan, Toshkent viloyatida yashovchi 30 yoshli Bekzod M.ni Bektemir tumani hududida qo‘lga olgan.
19-iyul kuni Mirzo Ulug‘bek tumani IIO FMB xodimlari Jinoyat kodeksining 169-moddasida (O‘g‘rilik) ko‘rsatilgan jinoyatni sodir etganlikda ayblanib, qidiruv e’lon qilingan, Toshkent viloyatidan bo‘lgan 21 yoshli Andrey O.ni mazkur tuman hududida qo‘lga oldi.
Shuningdek, Termiz shahrida 2015-yilning 15-iyul kuni Jinoyat kodeksining 278-moddasi 2-qismida (Qimor va tavakkalchilikka asoslangan boshqa o‘yinlarni tashkil etish hamda o‘tkazish) ko‘rsatilgan jinoyatni sodir etib, jinoiy javobgarlikdan qochib yurgan termizlik K.A. 2020-yilning 20-iyul kuni Toshkent shahrida xizmat safarida bo‘lgan viloyat Ichki ishlar boshqarmasi xodimlari tomonidan Yakkasaroy tumani hududida qo‘lga olingan.
Bundan tashqari, 18-iyul kuni Mirobod tumani jinoyat-qidiruv bo‘limi va PPX xodimlari Jinoyat kodeksining 248-moddasida (Qurol, o‘q-dorilar, portlovchi moddalar yoki portlatish qurilmalariga qonunga xilof ravishda egalik qilish) ko‘rsatilgan jinoyatni sodir etganlikda ayblanib, qidiruvga berilgan 38 yoshli Nikolay Ya.ni Qo‘yliq bozori hududida qo‘lga oldi.
Izoh (0)