Toshkentda 74 ta ko‘p tarmoqli markaziy va oilaviy poliklinika aholiga kun-u tun xizmat ko‘rsatish tizimiga o‘tkazildi

AOKA huzuridagi shtabda bo‘lib o‘tgan brifingda Koronavirusga qarshi shtab a’zosi Barno Odilova COVID-19 infeksiyasi bilan kasallangan bemorlarni ambulator sharoitda aniqlash, tashxis qo‘yish, davolash va reabilitatsiya qilish jarayonini takomillashtirish choralari haqida ma’lum qildi.

Ularga ko‘ra

• birlamchi tibbiy-sanitariya yordami muassasalari — Toshkent shahridagi 74 ta ko‘p tarmoqli markaziy va oilaviy polkilinika aholiga kecha-yu kunduz faoliyat yuritish tizimiga o‘tkazilgan;
• bunda tibbiyot xodimlari 12 soatlik ish rejimiga o‘tkazilgan (soat 8:00 dan soat 20:00 gacha va soat 20:00 dan soat 8:00 gacha).

Har bir poliklinikada mikrouchastkalar tashkil qilinib, ularga mas’ullar biriktirilgan va ularning asosiy vazifasi sifatida quyidagilar belgilangan:

• xonadonlarga telefon orqali qo‘ng‘iroq qilish, holidan xabar olish;
• kasalliklarni erta aniqlash va saralash (ambulator yordam uchun, laboratoriyaga, shifoxonaga);
• aniqlangan muammolarni joyida hal qilish.

Buning uchun Toshkent shahar poliklinikalari 750 dona mobil telefon bilan ta’minlangan va har bir oilaviy poliklinikada tun-u kun faoliyat yuritadigan Call-markaz sharoiti yaratilgan.

Har bir poliklinikada ambulator davolanishga olingan bemorlardan xabar olish va uy-shifoxona sharoitida davolash uchun mobil brigadalar tashkil qilingan. Mobil brigadalar tomonidan bemorlar uchun dor-darmon yetkazib berilmoqda;

Ambulator-poliklinika tizimida faoliyat yuritayotgan tibbiy xodimlar mehnatini rag‘batlantirish maqsadida Toshkent shahar hokimligi tomonidan:

• COVID-19 kasalligi profilaktikasi, diagnostika va davolashda ishtirok etayotgan tibbiyot xodimlari uchun 6 foizlik ustama haq to‘lash;
• tibbiyot xodimlarini zarur himoya vositalari (kombinezon, niqob, qo‘lqop, ko‘zoynak), antiseptik vositalar va pirometr, tibbiyot muassasalarini zararsizlantirish uchun dezinfeksiya eritmalari bilan ta’minlash;
• tibbiyot xodimlarini jamoat transporti harakatlanmagan paytda kelib-ketishi uchun avtotransport ajratish;
• aholi bilan telefon orqali muloqotni yaxshilash maqsadida har bir oilaviy poliklinikani 3 tadan statsionar telefon va qo‘shimcha mobil telefonlar bilan ta’minlash;
• mobil brigadalar uchun qo‘shimcha transport ajratish masalalari hal qilinishi tayinlandi.

Bemorlarni aniqlash, diagnostikasi, davolash jarayonlarini tartibga solish maqsadida vazir o‘rinbosari boshchiligida COVID-19- ambulator shtabi tashkil qilindi, Telegram’da maxsus kanal tashkil qilingan. Ushbu kanalga Sog‘liqni saqlash, ichki ishlar, hokimlik va mahalla vakillari (har bir tuman uchun mas’ul) birlashtirildi va axborot almashinuvi ta’minlangan.

Tibbiyot xodimlari tomonidan COVID-19’ga taalluqli bo‘lgan hisobot shakllarini maqbullashtirish, soddalashtirish bo‘yicha topshiriq berilgan.

Ambulator sharoitda davolanayotgan bemorlar nazoratini olib borish bo‘yicha Sog‘liqni saqlash, ichki ishlar va mahallaning hamkorlikdagi faoliyat mexanizmi ishlab chiqilgan.

Avval Toshkentning Yunusobod tumanidagi “O‘zekspomarkaz” pavilyonlarida koronaviruvsga chalingan bemorlarni joylashtirish uchun 500 kishiga mo‘ljallangan koyka-o‘rinlar tashkil qilingani, mazkur taqsimlash markaziga tibbiyot xodimlari ishga qabul qilinishi, shuningdek, Toshkent viloyati Zangiota tumani Ixtisoslashtirilgan ko‘p tarmoqli yuqumli kasalliklar shifoxonasiga shifokor va hamshiralar ishga taklif qilinayotgani haqida xabarlar berilgan.