Sog‘liqni saqlash vazirligi Toshkent shahrida koronavirusga chalingan 51 yoshli erkakning vafot etganini xabar qildi.
Xabarga ko‘ra, Toshkent shahri Olmazor tumanida yashagan 51 yoshli Z.S. 17-iyul kuni IIV Markaziy gospitalining reanimatsiya bo‘limiga yotqizilgan va 18-iyul kuni unda COVID-19 infeksiyasi borligi tasdiqlangan.
Bemorga COVID-19 infeksiyasining og‘ir kechishi, ikki tomonlama pnevmoniya tashxisi qo‘yilgan. Z.S.da kasallik o‘tkir nafas va yurak-qon tomir yetishmovchiligi asorati bilan kechgan.
Shuningdek, unda yurak ishemik kasalligi, qandli diabetning o‘ta og‘ir kechishi, ikkala boldir arteriyalari okklyuziyasi, chap son yonbosh arteriyasi stenozi, surunkali pankreatit kabi hamroh xastaliklar bo‘lgan.
Bemorga mutaxassislar tomonidan onlayn konsultatsiya va konsiliumlar o‘tkazilgan, davolash jarayoni belgilangan standartlar asosida olib borilgan.
Asosiy kasallik asoratlari hisobiga bemorning ahvoli keskin og‘irlashib, mutaxassislar tomonidan to‘liq hajmda, standart asosida o‘tkazilgan reanimatsion muolajalarga qaramasdan u o‘tkir nafas va yurak-qon tomir yetishmovchiligidan vafot etgan, deyiladi xabarda.
Avval O‘zbekiston Ichki ishlar vazirligi Yo‘l harakati xavfsizligi bosh boshqarmasi axborot xizmati katta mutaxassisi, podpolkovnik Zoyir Saydaliyev 2020-yil 21-iyul kuni 51 yoshida vafot etgani xabar qilingan, biroq podpolkovnikning o‘limi sababiga aniqlik kiritilmagan. IIV matbuot xizmati Zoyir Saydaliyevning vafotiga koronavirus infeksiyasi sabab bo‘lgani hozircha tasdiqlanmaganini bildirgandi.
12-iyul kuni Sergeli IIO FMB podpolkovnigi, 13 va 14-iyul kunlari Toshkent shahar IIBB mayori va IIV podpolkovnigi koronavirus infeksiyasi asoratlari oqibatida vafot etgani ma’lum bo‘lgan, keyinroq mazkur uchta o‘lim holati Sog‘liqni saqlash vazirligi tomonidan tasdiqlangandi.
Bu “Daryo” hisobi bo‘yicha 21-iyul soat 23:25 holatiga ko‘ra O‘zbekistondagi 99-o‘lim holati hisoblanadi. Sog‘liqni saqlash vazirligi taqdim etib kelayotgan statistika bo‘yicha esa mamlakatda epidemiya boshlanganidan buyon 95 kishi vafot etgan.
Davlat xizmatlari agentligi 15-iyul kuni Navoiy viloyatidagi 61 yoshli xodimi Adhamjon Dehqonov, Madaniyat vazirligi esa 18-iyul kuni 32 yoshli xodimi Akmal Irisov koronavirus asoratlaridan vafot etgani, Olmaliq shahri hokimligi 9 va 15-iyul kunlari shahar shifoxonalarida vafot etgan ikki ayolda koronavirus tasdiqlangani haqida xabar bergan. Biroq ushbu holatlar haqida SSV tomonidan ayni vaqtgacha axborot berilmagan.
Avval Toshkentda koronavirusga chalingan 64 yoshli erkak, 68 yoshli M.I. ismli ayolning hamda Andijonda 42 yoshli G‘.I ismli erkakning vafot etgani haqida xabarlar berilgandi.
Izoh (0)