Andijon hokimi viloyatdagi barcha tibbiyot muassasalari 24 soatlik ish tartibiga o‘tganini ma’lum qildi

Andijon viloyati hokimi Shuhrat Abdurahmonov koronavirusga chalingan fuqarolardan birinchi zarbani qabul qiladigan insonlar tez tibbiy yordam shifokorlari ekanligini bildirib, ularga sharoit yaratilmasa, kasallik tarqalishining oldini olish yanada qiyinlashi mumkinligini bildirdi. Bu haqda hokim 20-iyul, dushanba kuni jurnalistlar ishtirokida o‘tkazilgan brifingda ma’lum qildi, deya xabar berdi “Daryo” muxbiri.

Viloyat rahbari tibbiyot xodimlarining mehnatini e’tirof etar ekan, Andijondagi barcha tibbiyot muassasalari 24 soatlik ish tartibiga o‘tkazilganini ma’lum qildi. Shuningdek, ularning mehnatini rag‘batlantirish, zarur texnika, aloqa vositalari, jihozlar bilan ta’minlash bo‘yicha doimiy choralar ko‘rilayotganligini bildirdi.

“Aholiga o‘tgan safar qilgan murojaatimizdan so‘ng shifokorlar ko‘rsatilayotgan tibbiy xizmat sifatini oshirish uchun joylardagi bo‘linmalarga qo‘shimcha tez tibbiy yordam avtomashinalari kerakligini aytib, yordam so‘ragandi. Ularnining talab va istaklari bilan ikki kun ichida 16 ta yangi tez tibbiy yordam avtomashinasini olib kelib, topshirdik. Shu kuni haydovchilar, hamshiralar va vrachlar bilan alohida suhbatlashdim. Ularning tashvishlari bilan qiziqdim. Qarang, birorta tibbiyot xodimi charchadim, sharoitim chatoq degani yo‘q. Ular haqiqiy vatanparvarlik namunasini ko‘rsatib, kasallik bilan astoydil kurashmoqda, Gippokrat qasamiga sodiq qolmoqda. Bo‘lmasam, bularning hammasi 24 soatlik ish tartibiga o‘tgan. ‘Muammomiz yo‘q’ deyishsa ham ushbu jonkuyar insonlarni qo‘shimcha rag‘batlantirish, mukofot pullari berish, moddiy-texnik bazasini mustahkamlash, oziq-ovqat ta’minotini yaxshilash bo‘yicha mutasaddilarga qator topshiriqlar berdim”, — dedi Shuhrat Abdurahmonov.

Viloyat hokimining aytishicha, 19-iyul, yakshanba kuni viloyat bo‘yicha 97 nafar fuqaro tez yordamga isitma bilan murojaat qilgan.

“Nega aynan tez yordamga e’tibor qaratyapmiz? Chunki har qanday kasal birinchi navbatda tez yordam shifokorlariga ro‘para keladi. Koronavirus deganlarining asosiy belgisi ham isitma va tomoq og‘rig‘i. 103 ga qo‘ng‘iroq qilayotganlarning aksariyati ham shu belgilar bo‘yicha murojaat qiladi. Misol uchun 19-iyul, yakshanba kuni viloyat bo‘yicha 97 nafar fuqaro istima bilan murojaat qilgan. U virusga yo‘liqqan yoki yo‘liqmaganini test orqali bilish mumkin, xolos. Agar tez yordamdagilar sergak ishlasa, kasallik tarqalishining oldini olgan bo‘lamiz”, — dedi Andijon viloyati hokimi.