Samarqand viloyatida 10-iyul kuni koronavirusga chalinish bo‘yicha 37 ta holat aniqlandi. Shundan 27 tasi Samarqand shahrida qayd etilgan. Bu haqda viloyat hokimi Erkinjon Turdimov 10-iyul, shanba kuni samarqandliklarga ikkinchi marotaba yo‘llagan murojaatida ma’lum qildi, deya xabar berdi “Daryo” muxbiri.

“Vaziyat yomon tomonga qarab ketyapti. Viloyatda 10-iyul kuni 37 ta holat aniqlandi. Kasallanganlarning jami soni 573 nafarni tashkil etmoqda. Ulardan 475 nafari sog‘aygan. Davolanayotgan bemorlardan 3 nafarining ahvoli o‘ta og‘ir, 18 nafar bemor og‘ir ahvolda qolmoqda. 2775 nafar fuqaro karantinda”, — degan viloyat hokimi Erkinjon Turdimov.

Samarqandda bir kun ichida 30 dan ortiq kishida kasallik aniqlanishi ilgari hech qachon kuzatilmagan. Ammo Sog‘liqni saqlash vazirligi 10-iyul kuni Samarqandda 37 emas, 15 kishida koronavirus aniqlangani haqida xabar bergandi.

Foto: Telegram / @ssvmatbuotkotibi

Sog‘liqni saqlash vazirligi ma’lumotlari bo‘yicha, 10-iyul soat 23:30 holatiga ko‘ra, Samarqandda 536 kishida kasallik aniqlangan, 464 kishi koronavirusdan sog‘aygan. Erkinjon Turdimovdagi ma’lumotlar bo‘yicha viloyatda kasallanganlar 37 kishiga, sog‘ayganlar esa 11 kishiga ko‘proqdir.

Viloyat rahbari Samarqand shahrida bir kunda 27 ta holat aniqlanganiga e’tibor qaratarkan, shaharda vaziyat jiddiy ekanini alohida ta’kidladi. Shuningdek, Pastdarg‘om tumanida uch nafar, yana qator tumanlarda bir nafardan bemor aniqlanganini aytib, barchani vaziyatga jiddiy qarashga chaqirdi.

“Respublika bo‘yicha e’lon qilingan karantinga jiddiy qarashingizni so‘rayman. Chunki ko‘rsatkichlar yaxshi tomonga ketmayapti. Ijtimoiy tarmoqlarda guvoh bo‘lyapmiz, odamlar ‘bu yo‘q narsa, o‘ylab topilgan’, deb karantin qoidalarini qo‘pol ravishda buzishyapti. Men bekorga uch nafar fuqaroning o‘ta og‘ir ahvoldaligini, 18 kishi og‘ir holatdaligini aytmayapman, — dedi viloyat hokimi Erkinjon Turdimov. — Bor narsa ekanki, shunday ko‘rsatkichlar kuzatilyapti. O‘zimizni, bir-birimizni asramasak, o‘lim holatlari ko‘payishi mumkin. Buning oldini olishimiz, fuqarolarimizni asrashimiz kerak. Asosiy maqsad shu. Joylarda barcha tuman hokimlari, mutasaddi tashkilotlar kam ta’minlangan oilalarga, ishini yo‘qotgan, qiynalgan oilalarga oziq-ovqat ko‘rinishida moddiy yordam ko‘rsatib boradi”.

SSV butun respublikada ahvoli og‘ir bemorlar soni 43, ahvoli o‘ta og‘ir bemorlar soni 10 nafarni tashkil etayotganini ma’lum qilgan. Erkinjon Turdimovning so‘zlaridan shu narsa ma’lum bo‘lyaptiki, O‘zbekiston bo‘yicha ahvoli og‘ir bemorlarning 41 foizi va ahvoli o‘ta og‘ir bemorlarning 30 foizi hozir Samarqandda davolanmoqda.

Viloyat hokimi, shuningdek, fuqarolardan o‘zlarida kasallik alomatini sezgan zahoti tibbiy muassasalarga murojaat qilishini so‘ragan.

“Fuqarolarimiz koronavirusga yo‘liqqandan keyin o‘zlaricha davolanib, pnevmoniyaga aylangandan so‘ng tibbiy muassasalarga murojaat qilmoqda. Isitma paydo bo‘ldimi, darhol tibbiy muassasaga murojaat etishingizni so‘rayman. Tibbiyot xodimlari, mutaxassislar kerakli choralarni ko‘rishadi. O‘zimni davolayman, tez o‘tib ketadi, bu o‘tkinchi narsa, ikkita tabletka ichsam, yaxshi bo‘laman, degan narsadan yiroq bo‘ling, darhol tibbiyot muassasasiga xabar bering. Agar birlashsak, koronavirusni yengamiz”, — degan Erkinjon Turdimov.

Sog‘liqni saqlash vazirligi O‘zbekistonda 11-iyul soat 10:00 holatiga ko‘ra, koronavirusga chalinganlar bo‘yicha yangilangan ma’lumotlarni taqdim etdi. Bir kechada koronavirus infeksiyasi qayd etilganlar soni 179 kishiga ko‘payib, kasallanganlarning umumiy soni 12 206 nafarga yetdi. Yangi ma’lumotlarda Samarqandda koronavirus yuqtirib olish bilan bog‘liq yangi holatlar haqida xabar berilmagan. Shuningdek, koronavirusdan tuzalgan hamda ahvoli og‘ir va o‘ta og‘ir bemorlar sonida ham o‘zgarish bo‘lmagan.

Eslatib o‘tamiz, Navoiyda yuz bergan ilk o‘lim holati haqida ham birinchi bo‘lib viloyat hokimi Qobul Tursunov 7-iyul kuni ma’lum qilgandi. Keyinroq Navoiy viloyati hokimligi axborot xizmati bemorning yoshi, jinsi va unga qo‘yilgan tashxis haqida ma’lumot bergandi. Ushbu xabarlarni kun oxirida SSV tasdiqlagandi.