Jahon sog‘liqni saqlash tashkilotining Yevropa mintaqaviy byurosi JSSTning O‘zbekistondagi vakolatxonasi ko‘magida qiymati 4 million dollardan ortiq bo‘lgan insonparvarlik yordamini yetkazib berdi. Bu haqda JSSTning O‘zbekistondagi vakolatxonasi ma’lum qildi.
Umumiy og‘irligi 85 tonna bo‘lgan yuk JSST bosh qarorgohi tomonidan Birdamlik va COVID-19’ga javob berish global jamg‘armasi orqali xarid qilingan.
Insonparvarlik yukini jo‘natish ikki bosqichda amalga oshirildi. Birinchi partiya Toshkentga 8-iyulda yetib kelib, o‘z ichiga yuz uchun 619 400 ta himoya qalqonchasi va 2 176 000 dona jarrohlik niqobini oldi. Ikkinchi partiya poytaxtga 17-iyulda yetkazib berildi. U shaxsiy himoya vositalari, jumladan, 95 200 dona himoya ko‘zoynagi, 178 ming dona himoya xalati, 12 ming dona jarrohlik niqobi, 1 064 000 dona KN95 respirator niqobidan iborat.
Yuk O‘zbekiston Sog‘liqni saqlash vazirligi huzuridagi Sanitariya-epidemiologik osoyishtalik agentligiga topshirish uchun mo‘ljallangan.
Vakolatxona tomonidan ta’kidlanishicha, mazkur insonparvarlik yuki Jahon sog‘liqni saqlash tashkiloti tomonidan O‘zbekistonga ko‘rsatilayotgan yordamning bir qismi hisoblanadi.
Avvalroq O‘zbekiston AQSh va Janubiy Koreyadan insonparvarlik yordamini qabul qilgandi va Qirg‘izistonga navbatdagi insonparvarlik yordamini yuborgandi.
Izoh (0)