Жаҳон соғлиқни сақлаш ташкилотининг Европа минтақавий бюроси ЖССТнинг Ўзбекистондаги ваколатхонаси кўмагида қиймати 4 миллион доллардан ортиқ бўлган инсонпарварлик ёрдамини етказиб берди. Бу ҳақда ЖССТнинг Ўзбекистондаги ваколатхонаси маълум қилди.
Умумий оғирлиги 85 тонна бўлган юк ЖССТ бош қароргоҳи томонидан Бирдамлик ва COVID-19’га жавоб бериш глобал жамғармаси орқали харид қилинган.
Инсонпарварлик юкини жўнатиш икки босқичда амалга оширилди. Биринчи партия Тошкентга 8 июлда етиб келиб, ўз ичига юз учун 619 400 та ҳимоя қалқончаси ва 2 176 000 дона жарроҳлик ниқобини олди. Иккинчи партия пойтахтга 17 июлда етказиб берилди. У шахсий ҳимоя воситалари, жумладан, 95 200 дона ҳимоя кўзойнаги, 178 минг дона ҳимоя халати, 12 минг дона жарроҳлик ниқоби, 1 064 000 дона KN95 респиратор ниқобидан иборат.
Юк Ўзбекистон Соғлиқни сақлаш вазирлиги ҳузуридаги Санитария-эпидемиологик осойишталик агентлигига топшириш учун мўлжалланган.
Ваколатхона томонидан таъкидланишича, мазкур инсонпарварлик юки Жаҳон соғлиқни сақлаш ташкилоти томонидан Ўзбекистонга кўрсатилаётган ёрдамнинг бир қисми ҳисобланади.
Аввалроқ Ўзбекистон АҚШ ва Жанубий Кореядан инсонпарварлик ёрдамини қабул қилганди ва Қирғизистонга навбатдаги инсонпарварлик ёрдамини юборганди.
Изоҳ (0)