O‘zbekiston bosh prokurori Nig‘matilla Yo‘ldoshev fuqarolar tibbiyot muassasalariga 103 raqami orqali tez yordamga murojaat qilishlarida biron-bir bandlik holatlari bo‘lmasligi to‘g‘risida davlat rahbari tomonidan topshiriq olgani haqida aytgan edi.

Endilikda fuqarolar tez tibbiy yordam xizmatining 103 raqamiga qo‘ng‘iroq qilganda dispetcher ularga 10 soniyada javob berishi tizimi joriy qilindi.

Bosh prokuratura matbuot xizmati bugungi kunga kelib ayni masalada yana qanday choralar amalga oshirilgani haqida “Daryo”ga ma’lum qildi.

Ta’kidlanishicha, hozirda Toshkent shahrining Chilonzor tumanida joylashgan markaziy stansiyada Chilonzor tibbiyot kolleji, Toshkent tibbiyot akademiyasi, Vrachlar malakasini oshirish institutining vakillaridan iborat maxsus guruh ishlamoqda. Qo‘ng‘iroqlarni qabul qilish uchun qo‘shimcha 70 ta joy tashkil qilinib, 70 nafar ko‘ngillilarga operatorlik faoliyatini yuritish uchun o‘quv kurslar tashkil etilgan. Stansiyani elektr energiyasi bilan uzluksiz ta’minlash maqsadida elektr quvvatini oshirish uchun 10 million so‘mlik “AVR” uskunasi olib kelinib, o‘rnatilgan hamda stansiyada mavjud ta’mirtalab ahvoldagi 2 ta generator ta’mirlangan.

Shuningdek, Toshkent davlat iqtisodiyot universitetida ham tibbiy maslahat ko‘rsatish bo‘yicha 50 nafar ko‘ngilli shifokordan iborat Call-markaz ishga tushgan. Bugungi kungacha 1105 va 1197 raqamli Call-markazlarga tushgan 36 218 ta murojaat bo‘yicha tibbiy maslahatlar berilgan.

Eslatib o‘tamiz, Prezident 14-iyul kuni o‘tkazilgan videoselektorda koronavirusga qarshi kurash uchun mamlakatda barcha zaxira va imkoniyatlar mavjudligini ta’kidlagan, biroq hozirda epidemiologik vaziyat juda og‘irligini aytgandi. Shuningdek, davlat rahbari koronavirusni aniqlash uchun test topshirish jarayonini soddalashtirish, hududlarda uch oylik dori zaxirasini yaratish hamda dorixonalarda va bozorlarda narxlar oshishining oldini olish, zarur joylarda karantin choralarini kuchaytirish bo‘yicha topshiriq bergan.