Samarqand viloyatida mahalliy budjet mablag‘lari hisobidan 3 milliard 200 million so‘mga COVID-19 infeksiyasiga qarshi davolanishda ishlatiladigan dori vositalari xarid qilingan. Hozirda koronavirusga chalingan bemorlarni davolash uchun 65 turdagi ikki oylik dori zaxiralari mavjud.
“COVID-19 kasalligi aniqlanib, uyda yoki shifoxonada davolanayotgan fuqarolarga davlat tomonidan, ya’ni viloyat sog‘liqni saqlash boshqarmasi tomonidan bepul dori-darmonlar yetkazib beriladi. Agarda o‘sha dorilarni ham sotishga uringan shaxslar bo‘lsa, bunday shaxslar oramizda bo‘lishi mumkin emas, — dedi viloyat hokimi Erkinjon Turdimov. — Hozirda koronavirusga chalingan bemorlarni davolash uchun 65 turdagi ikki oylik dori zaxiramiz mavjud. Dori sotib olish uchun yana mablag‘ berganmiz. Bu masala bo‘yicha hech qanday muammo bo‘lishi mumkin emas”.
Viloyat hokimining ma’lum qilishicha, koronavirus pandemiyasi boshlangandan buyon qariyb 110 ming nafar fuqarodan test olingan. Bugungi kunga kelib viloyatda har kuni 1800-2000 ta test sinovi o‘tkazilmoqda. Ayni paytda 15 mingdan ortiq test zaxirasi mavjud. Test zaxiralariga talab bo‘ladigan bo‘lsa, markazlashgan tartibda yetkazib berish imkoni bor.
“Ko‘pchilik korxona rahbarlari sanitariya va epidemiologiya osoyishtalik markaziga qo‘ng‘iroq qilib, xodimlaridan test olib ketishini aytishadi. Marhamat, o‘sha korxonalar xususiy klinikalarga murojaat qilib, ular bilan shartnoma tuzib, xodimlarini ko‘rikdan o‘tkazsin, — dedi Erkinjon Turdimov. — Nima uchun bank yoki biror firmaga borib, ularni tekin testdan o‘tkazib berishimiz kerak? Xususiy korxonalarda pullik test sinovlari olib borilmoqda. Bugungi kunda bitta test sinovi 240 ming so‘m turadi. Test topshirib, o‘zini xotirjam qilmoqchi bo‘lsa, marhamat shartnoma tuzib, xususiy klinikalar orqali analiz topshirishi mumkin. Test natijasi aslida olti soatda chiqishi kerak. Ammo bizda talab kuchayib ketganligi uchun bir yarim sutkalab javoblarni kutishga majbur bo‘lyapmiz”.
Erkinjon Turdimov viloyatda ahvol qoniqarsiz ekanligini ta’kidlar ekan, nafaqat fuqarolar, balki tizim ham shoshib qolganligini bildirdi.
“Viloyat bo‘yicha ahvolni baholaydigan bo‘lsak, ahvol qoniqarsiz deyishga barcha asoslarimiz bor. Bugun hammamiz bir bo‘ladigan, yakdillik bilan harakat qiladigan vaqt keldi. Agar birgalikda kurashmasak, koronavirus pandemiyasi ko‘p odamni sarson qiladi. Nima uchun sarson qiladi, deyapman. Chunki qurbonlar ko‘payishi mumkin. Shuning uchun ham birlashishimiz kerak. Bugun ko‘pchilik shoshib qoldi. Nafaqat fuqarolar, balki tizim ham shoshib qoldi, desak haqiqatni aytgan bo‘lamiz. Hammamiz hamjihatlikda harakat qilsak, bu balodan tez qutulamiz. Juda kam talafot ko‘rib qutulishimiz kerak. Odamlarimiz nobud bo‘lmasligi kerak. Fuqarolarimiz buning asoratidan qiynalmasligi kerak. Eng birinchi vazifamiz shundan iborat”, — dedi Erkinjon Turdimov.
Izoh (0)