Qozog‘istonda koronavirus qurbonlari soni 120 kishiga, Qirg‘izistonda esa 40 kishiga yetdi

Qozog‘istonda o‘tgan bir sutka ichida yana 507 kishida koronavirus aniqlandi, deb xabar beradi Tengrinews.

Mamlakat bo‘ylab kasallar sonining ortishi 2,9 foizni tashkil etmoqda. Koronavirusga chalinish bo‘yicha yangi holatlar quyidagi hududlarda aniqlangan:

• Nur-Sulton shahri — 103 (3,2 foiz);
• Qarag‘anda viloyati — 58 (3,2 foiz);
• Atirau viloyati — 38 (2,7 foiz);
• Sharqiy Qozog‘iston viloyati — 34 (8,6 foiz);
• Kostanay viloyati — 33 (11,3 foiz);
• G‘arbiy Qozog‘iston viloyati — 32 (2,8 foiz);
• Olmaota shahri — 32 (1 foiz);
• Pavlodar viloyati — 31 (6,6 foiz);
• Shimoliy Qozog‘iston viloyati — 27 (13,6 foiz);
• Aqmo‘la viloyati — 22 (7,2 foiz);
• Chimkent shahri — 19 (1,5 foiz);
• Turkiston viloyati — 19 (3,3 foiz);
• Aqto‘be viloyati — 18 (3 foiz);
• Mang‘istov viloyati — 15 (3,6 foiz);
• Olmaota viloyati — 10 (1,7 foiz);
• Jambil viloyati — 9 (1,5 foiz);
• Qizilo‘rda viloyati — 7 (1,3 foiz).

Butun mamlakat bo‘ylab koronavirusga chalinganlar soni 17 732 kishiga yetgan. Hozirga qadar 10 897 kishi sog‘aygan, 120 kishi virus qurboniga aylangan. Shuningdek, 9809 kishi koronavirusni belgisiz tashuvchi sifatida qayd etilgan.Qirg‘izistonda 22-iyun holatiga ko‘ra, yana 205 kishida koronavirus infeksiyasi aniqlandi. Bu haqda mamlakat Sog‘liqni saqlash vazirligi xabar berdi.

Koronavirusga chalingan yangi kasallarning 82 nafari Bishkek shahri hisobiga to‘g‘ri kelmoqda. Shuningdek, quyidagi hududlarda ham koronavirus bilan kasallanish bo‘yicha yangi holatlar qayd etilgan:

• Chuy viloyati — 33;
• O‘sh viloyati —20;
• O‘sh shahri — 25;
• Issiqko‘l viloyati — 10;
• Jalolobod viloyati — 8;
• Talas viloyati — 19;
• Norin viloyati — 6.

Shuningdek, o‘tgan bir sutka ichida 26 nafar tibbiyot xodimida virus aniqlangan.

Butun mamlakat bo‘ylab COVID-19 bilan kasallanganlar soni 3356 kishiga yetdi. Ularning 40 nafari virus qurboniga aylangan. Hozirga qadar 2021 nafar bemor davolanishga muvaffaq bo‘lgan. Hozirda 1295 bemor statsionarlarda qolmoqda.

Afg‘onistonda o‘tgan bir sutka ichida yana 409 kishida koronavirus aniqlandi, deb xabar beradi Tolo News.

Mamlakat Sog‘liqni saqlash vazirligining ma’lumotlariga ko‘ra, Afg‘onistonda koronavirusga chalinganlar soni 28 833 kishini tashkil etmoqda.

O‘tgan bir sutka davomida poytaxt Kobul shahrining o‘zida 184 kishida koronavirus aniqlangan.

Butun mamlakat bo‘ylab koronavirus oqibatida vafot etganlarning jami soni 581 kishiga yetdi, hozirga qadar 8764 bemor davolanishga muvaffaq bo‘ldi. O‘tgan bir sutkaning o‘zida 472 kishi sog‘aygan, shu kungacha Afg‘onistonda koronavirusga qarshi 64,9 mingdan ortiq test o‘tkazilgan.

Tojikistonda koronavirus bilan kasallanganlar soni 5457 kishiga yetdi, deb xabar beradi “RIA Novosti”. O‘tgan sutka davomida yana 61 kishida koronavirus aniqlangan.

Mamlakatda o‘tgan bir sutka ichida 58 kishiga shifoxonadan javob berilgan bo‘lib, hozirda Tojikistonda 3995 bemor davolanishga muvaffaq bo‘lgan.

21-iyun holatiga ko‘ra, mamlakatda 52 kishi COVID-19 qurboniga aylangan, 166 bemor shifoxonalarda qolmoqda.

O‘zbekistonda 22-iyun soat 10:00 holatiga ko‘ra, koronavirusga chalinganlar soni 6358 nafarga yetdi. Mamlakatda hozirgacha koronavirusga chalingan shaxslarning 4377 nafari sog‘aygan, 19 nafari esa kasallik asoratlari oqibatida vafot etgan.