21-iyundan boshlab Ozarbayjonning sakkizta yirik shahrida, jumladan, Bokuda ham ikki haftalik qattiq karantin boshlandi, deb xabar beradi “TASS”.
Ta’kidlanishicha, hukumat mamlakatda koronavirus bilan kasallanganlar soni ortib ketayotgani bois 21-iyundan 5-iyulga qadar poytaxtda hamda Ganja, Sumgait, Lenkoran, Yevlax, Masalla, Jalilobod, shuningdek, Absheron tumanida karantin choralari kuchaytirilgan. Mazkur hududlarning barchasi infeksiyaga chalinganlar soni eng ko‘p qayd etilgan birinchi klasterga kiradi.
Ozarbayjon Vazirlar mahkamasining qaroriga ko‘ra, ushbu davr mobaynida oziq-ovqat do‘konlari va dorixonalardan tashqari yirik savdo markazlari yana yopiladi, kafe va restoranlarga ovqatni faqatgina yetkazib berishga ruxsat etiladi. Muzeylar, ko‘rgazma zallar, sartaroshxonalar va go‘zallik salonlari ham o‘z faoliyatini to‘xtatadi. Ushbu cheklovlar mamlakatda mart oyining oxirida joriy etilib, may oyining ikkinchi yarmiga kelib olib tashlangandi.
Yangi cheklov qoidalariga ko‘ra, qo‘shimcha izolyatsiya choralari joriy etiladi, harakatlar cheklanadi. Karantin rejimida ishlashga ruxsat etilgan davlat va budjet tashkilotlari, shuningdek, xususiy kompaniya xodimlarining bir qismi masofadan turib ishlashga o‘tadi.
Qolgan fuqarolar uchun 5-apreldan 18-mayga qadar amalga bo‘lgan SMS-ruxsat tizimi qayta joriy etiladi. Ular o‘zi yashayotgan joyni uch holatda tark etishi mumkin: tibbiyot yordamidan foydalanish, oziq-ovqat yoki dori vositalarini xarid qilish, shuningdek, bank yoki pochtaga borish; toza havoda aylanish va yaqin qarindoshlarining dafn marosimida ishtirok etish uchun. Buning uchun maxsus kod va shaxsni tasdiqlovchi ma’lumotlarni tegishli raqamga SMS tarzida yuborish va ruxsat olish kerak bo‘ladi. Ta’kidlanishicha, shifokor qabuliga borish, xaridlarni amalga oshirish va sayr qilish ikki soatdan oshmasligi kerak va buning uchun ruxsat bir kunda bir marotaba beriladi.
So‘nggi ma’lumotlarga ko‘ra, Ozarbayjonda koronavirus bilan kasallanganlar soni 12 238 kishiga yetgan. Hozirga qadar mamlakatda 6516 kishi virusdan sog‘ayishga muvaffaq bo‘lgan, 148 bemor COVID-19 qurboniga aylangan.
Izoh (0)