Qozog‘iston sog‘liqni saqlash vaziri Yeljan Birtanovda koronavirus aniqlandi. Bu haqda vazir o‘zining Facebook’dagi sahifasi orqali ma’lum qilgan.

Foto: “Nur.kz”

“Do‘stlar, afsuski, sizlarga bir yomon xabarni aytishga majburman. So‘nggi marta koronavirusga topshirgan testim natijasi ijobiy chiqdi. Bu belgisiz shakli bo‘lmagani uchun yuqumli kasalliklar shifoxonasiga yotdim”, — deb yozari Birtanov.

“Qattiq sanitariya choralariga rioya qilganimga qaramay, xavf doimo bor. Ayniqsa, bu ishlayotgan va masofadan turib ishlay olmaydiganlarga tegishli. So‘nggi kunlarda bir qator viloyatlarda kasallar soni ortayotgani kuzatilmoqda, xususan, tadbirkorlar, korxona xodimlari, tibbiyot xodimlari, davlat xizmatchilari, OAV vakillari orasida. Ko‘plab fuqarolarimiz hozirda Qozog‘istonda global inqiroz oqibatlari va pandemiyaga bog‘liq muammolarni hal etish bilan shug‘ullanmoqda. Shu sababli tez-tez shaxsiy uchrashuvlar, joylarga safarga chiqishga to‘g‘ri kelmoqda. Bu esa bizni COVID-19 bilan kasallanish xavfiga yanada yaqinlashtiradi”, — deya qayd etadi vazir.

Shuningdek, Yeljan Birtanov barcha qozog‘istonliklardan “shaxsiy karantin”ga rioya qilishni so‘radi. Xususan, ish joyi, transport vositalari va do‘konlarda ijtimoiy masofalanishga qoidalariga amal qilish, imkoni boricha masofadan turib ishlash, yaqinlar va do‘stlar bilan onlayn muloqot qilish, jamoat joylarida niqobda yurish, qo‘lni kamida 20 soniya davomida yuvish kabi talablarni takrorlab o‘tgan.

Eslatib o‘tamiz, bunga qadar Ispaniya bosh vazirining rafiqasida, AQShdagi respublikachi kongressmenda, Braziliya Senati raisida, Monako knyazida, Isroil sog‘liqni saqlash vazirida, Rossiya prezidenti bilan ko‘rishgan shifokorda, Rossiya bosh vaziri va prezident matbuot kotibida, shuningdek, Armaniston bosh vaziri va Checheniston rahbarida ham koronavirus aniqlangan edi.