Vazirlar Mahkamasining ikki xodimida koronavirus aniqlandi, deb xabar bermoqda Sog‘liqni saqlash vazirligi. Ularda infeksiya 18-iyun, payshanba kuni tasdiqlangan.
Bundan bir kun avval Vazirlar Mahkamasidagi departament mudirlaridan birida koronavirus aniqlangani haqdagi xabarlar ijtimoiy tarmoqlarda tarqalgandi. “Daryo”ning hukumatdagi manbasi Vazirlar Mahkamasi binosi qat’iy karantinga olinganini ma’lum qilgandi.
SSV matbuot xizmatining bildirishicha, 17-iyun kuni esa 189 nafar bemordan 13 nafari aholi orasida tasdiqlangan. 16-iyunda koronavirus tasdiqlangan 230 nafar bemorning 20 nafari aholi orasida aniqlangandi.
Hududlar kesimida olinsa, Toshkent shahrida 5 nafar, Buxoro viloyatida 3 nafar, Toshkent viloyatida ham 3 nafar, Surxondaryo viloyatida esa 2 nafarni tashkil etdi.
Jumladan, Toshkent shahri ichki ishlar tizimi tergovchisida, Mirobod tumanida yashovchi fuqaroda (ikkalasida ham tana harorati ko‘tarilgan va tomoqda og‘riq kuzatilganligi sababli o‘zlari borib namuna topshirgan), “O‘zbekiston havo yo‘llari” AJning 2 nafar mutaxassisida (ishga chiqish uchun namuna topshirgan) kasallik qayd etilgan.
Surxondaryo viloyati Boysun tumani Xalq banki filiali xodimi va uning onasida, Sirdaryo viloyatidagi elektr stansiyasi ishchisi va uning o‘g‘lida (tana harorati ko‘tarilgan va Bekobod tumanidagi shifoxonaga yotqizilgan), Chirchiq tumanida yashovchi fuqaroda (tana harorati ko‘tarilgan va tez tibbiy yordam xizmati orqali yuqumli kasalliklar shifoxonasiga yotqizilgan), Buxoro viloyati ko‘z kasalliklari shifoxonasining 3 nafar tibbiyot xodimida ham infeksiya aniqlangan.
18-iyun soat 10:00 holatiga ko‘ra, koronavirusga chalinganlar soni 15 kishiga oshgan bo‘lib, ularning 9 nafari Toshkent shahri aholisi orasida qayd etildi.
Izoh (0)