Jizzax viloyati G‘allaorol tumanidagi “Sangzor-15” yo‘l-patrul xizmati maskanida 15-iyun kuni Toshkent shahriga olib ketilayotgan 1679 kilogramm sifatsiz go‘sht to‘xtatib qolindi. Bu haqda Ichki ishlar vazirligi xabar berdi.
Ma’lum qilinishicha, 15-iyun kuni Jizzax viloyati IIB xodimlari tomonidan Kia Bongo rusumli yuk mashinasi to‘xtatib tekshirilganida, uning yukxonasida tegishli hujjatlari bo‘lmagan 1679 kilogramm go‘sht olib ketilayotgani aniqlandi.
Surishtiruv davomida Qashqadaryo viloyati Koson tumanida yashovchi 1988-yilda tug‘ilgan haydovchi go‘shtni Toshkent shahrida noma’lum shaxslar qabul qilib olishi kerakligini, lekin mahsulotning nima maqsadda ishlatilishini bilmasligini ma’lum qilgan.
Qayd etilishicha, qop va polietilen xaltalarga joylangan qo‘lansa hidli ushbu go‘sht tarkibidan birorta ham suyak topilmagan. Bu esa go‘shtning qaysi hayvonga mansubligini aniqlashni qiyinlashtiradi. Ammo mahsulot qoramol, qo‘y va echkiga tegishli emas, degan xulosaga kelingan.
“Aslida tashilayotgan har qanday go‘sht veterinar ko‘rigidan o‘tkazilishi va bu to‘g‘risida ma’lumotnoma berilishi lozim. Ya’ni veterinar etning sifatli ekani, viruslar bilan zararlanmaganini kafolatlashi shart. Shuningdek, go‘shni yetkazib beruvchi va oluvchi tadbirkorlik subyektlari o‘rtasida shartnoma tuzilishi zarur”, — deyiladi vazirlik xabarda.
IIV xabarida bir qator kimyoviy tozalashlardan so‘ng eng sifatsiz go‘shtni ham tayyor yoki yarim tayyor mahsulotga aylantirish mumkinligi ta’kidlangan.
Ayni vaqtda go‘sht Jizzax shahridagi muzxonada saqlanmoqda. Mutaxassislar mahsulotning sifatini aniqlash, xususan, kasallik uyg‘otuvchi omillar bor-yo‘qligini tekshirmoqda. Yakunda sifatsiz go‘shtlarni yo‘q qilish ko‘zda tutilgan.
Vazirlik tomonidan ma’lum qilinishicha, avvalroq Zomin tumanidagi “Yakkabog‘-15” yo‘l-patrul xizmati maskanida ham poytaxtga olib ketilayotgan 1710 kilogramm sifatsiz go‘sht to‘xtatib qolingan.
Izoh (0)