Вазирлар Маҳкамасининг икки ходимида коронавирус аниқланди, деб хабар бермоқда Соғлиқни сақлаш вазирлиги. Уларда инфекция 18 июнь, пайшанба куни тасдиқланган.
Бундан бир кун аввал Вазирлар Маҳкамасидаги департамент мудирларидан бирида коронавирус аниқлангани ҳақдаги хабарлар ижтимоий тармоқларда тарқалганди. «Дарё»нинг ҳукуматдаги манбаси Вазирлар Маҳкамаси биноси қатъий карантинга олинганини маълум қилганди.
ССВ матбуот хизматининг билдиришича, 17 июнь куни эса 189 нафар бемордан 13 нафари аҳоли орасида тасдиқланган. 16 июнда коронавирус тасдиқланган 230 нафар беморнинг 20 нафари аҳоли орасида аниқланганди.
Ҳудудлар кесимида олинса, Тошкент шаҳрида 5 нафар, Бухоро вилоятида 3 нафар, Тошкент вилоятида ҳам 3 нафар, Сурхондарё вилоятида эса 2 нафарни ташкил этди.
Жумладан, Тошкент шаҳри ички ишлар тизими терговчисида, Миробод туманида яшовчи фуқарода (иккаласида ҳам тана ҳарорати кўтарилган ва томоқда оғриқ кузатилганлиги сабабли ўзлари бориб намуна топширган), «Ўзбекистон ҳаво йўллари» АЖнинг 2 нафар мутахассисида (ишга чиқиш учун намуна топширган) касаллик қайд этилган.
Сурхондарё вилояти Бойсун тумани Халқ банки филиали ходими ва унинг онасида, Сирдарё вилоятидаги электр станцияси ишчиси ва унинг ўғлида (тана ҳарорати кўтарилган ва Бекобод туманидаги шифохонага ётқизилган), Чирчиқ туманида яшовчи фуқарода (тана ҳарорати кўтарилган ва тез тиббий ёрдам хизмати орқали юқумли касалликлар шифохонасига ётқизилган), Бухоро вилояти кўз касалликлари шифохонасининг 3 нафар тиббиёт ходимида ҳам инфекция аниқланган.
18 июнь соат 10:00 ҳолатига кўра, коронавирусга чалинганлар сони 15 кишига ошган бўлиб, уларнинг 9 нафари Тошкент шаҳри аҳолиси орасида қайд этилди.
Изоҳ (0)