AQSh prezidenti Donald Tramp amerikalik harbiy xizmatchilarning Afg‘onistondagi jinoyatlarini tergov qilishda ishtirok etuvchi Xalqaro jinoyat sudi xodimlariga qarshi sanksiyalar joriy etish imkonini beradigan qarorni imzoladi. Bu haqda Oq uy matbuot xizmati xabar berdi.
Mazkur qaror AQSh Moliya vazirligiga Xalqaro jinoyat sudi xodimlarining moliyaviy aktivlarini bloklash, Davlat departamentiga esa ularning mamlakatga kirishini taqiqlash imkoniyatini beradi.
Oq uy bayonotida ta’kidlanishicha, Xalqaro jinoyat sudi AQSh va uning ittifoqchilari, xususan, Isroilga qarshi “siyosiy tergov o‘tkazmoqda”. Ma’lum qilinishicha, Vashingtonda XJSning yuqori darajadagi rahbariyatida korrupsiya mavjudligini taxmin qilishga asos bor, bu esa tergovning xolis o‘tishini ta’minlamaydi.
Amerikalik harbiylarning “Tolibon” harakati a’zolari va Afg‘oniston harbiylariga nisbatan amalga oshirgan jinoyatlariga qarshi dastlabki xalqaro tergov ishlari 2006-yilda boshlangan edi. 2017-yilda ayblov tomoni mojaro vaqtida harbiy jinoyatlar sodir etilganligini ma’lum qilgan. 2020-yilning martida XJS Apellyatsiya palatasi to‘laqonli tergovni boshlashga ruxsat bergandi.
Eslatib o‘tamiz, 2019-yilning iyulida AQSh prezidenti Donald Tramp 2020-yilning noyabrida o‘tkaziladigan prezidentlik saylovlariga qadar amerikalik harbiylarni Afg‘onistondan olib chiqib ketish niyatida ekanligini ma’lum qilgandi.
Mavzuga doir: Afg‘onistonda ikki nafar amerikalik harbiy halok bo‘ldi
Izoh (0)