АҚШ президенти Дональд Трамп америкалик ҳарбий хизматчиларнинг Афғонистондаги жиноятларини тергов қилишда иштирок этувчи Халқаро жиноят суди ходимларига қарши санкциялар жорий этиш имконини берадиган қарорни имзолади. Бу ҳақда Оқ уй матбуот хизмати хабар берди.
Мазкур қарор АҚШ Молия вазирлигига Халқаро жиноят суди ходимларининг молиявий активларини блоклаш, Давлат департаментига эса уларнинг мамлакатга киришини тақиқлаш имкониятини беради.
Оқ уй баёнотида таъкидланишича, Халқаро жиноят суди АҚШ ва унинг иттифоқчилари, хусусан, Исроилга қарши «сиёсий тергов ўтказмоқда». Маълум қилинишича, Вашингтонда ХЖСнинг юқори даражадаги раҳбариятида коррупция мавжудлигини тахмин қилишга асос бор, бу эса терговнинг холис ўтишини таъминламайди.
Америкалик ҳарбийларнинг «Толибон» ҳаракати аъзолари ва Афғонистон ҳарбийларига нисбатан амалга оширган жиноятларига қарши дастлабки халқаро тергов ишлари 2006 йилда бошланган эди. 2017 йилда айблов томони можаро вақтида ҳарбий жиноятлар содир этилганлигини маълум қилган. 2020 йилнинг мартида ХЖС Апелляция палатаси тўлақонли терговни бошлашга рухсат берганди.
Эслатиб ўтамиз, 2019 йилнинг июлида АҚШ президенти Дональд Трамп 2020 йилнинг ноябрида ўтказиладиган президентлик сайловларига қадар америкалик ҳарбийларни Афғонистондан олиб чиқиб кетиш ниятида эканлигини маълум қилганди.
Мавзуга доир: Афғонистонда икки нафар америкалик ҳарбий ҳалок бўлди
Изоҳ (0)