Donald Tramp amerikalik harbiylar qaysi sanagacha Afg‘onistondan olib chiqib ketilishini ma’lum qildi

AQSh prezidenti Donald Tramp 2020-yilning noyabrida o‘tkaziladigan prezidentlik saylovlariga qadar amerikalik harbiylarni Afg‘onistondan olib chiqib ketish niyatida, deb xabar beradi “Liga.Novosti”.

AQSh davlat kotibi Maykl Pompeoning so‘zlariga ko‘ra, Tramp “oxiri yo‘q urushni to‘xtatish” va qo‘shinlarni olib chiqib ketish bo‘yicha ko‘rsatma bergan.

AQSh harbiy xizmatchilari 2001-yilning oktabridan buyon Afg‘onistonda. Ayni vaqtda u yerda 14 mingga yaqin amerikalik askar va ofitserlar borligi ma’lum.

Vashington Afg‘onistonda tinchlikni ta’minlash yo‘lida 2018-yilning iyulidan beri “Tolibon” radikal afg‘on harakatining yuqori vakolatli vakillari bilan to‘g‘ridan-to‘g‘ri muzokalar o‘tkazmoqda. Muzokalarning asosiy mavzusi — xorijlik harbiylarni mamlakat hududidan olib chiqib ketish va Afg‘onistonning terrorchilik guruhlari uchun “bandargoh”ga aylanib qolmasligini ta’minlash.

Iyul oyining boshida Tolibon AQSh bilan qator masalalarda kelishuvga erishganini ma’lum qilgandi.