Нарпай туман ХТБ масъули жинояти учун лавозимида ишлаш ҳуқуқидан маҳрум бўлганди. Бироқ у фаолиятини давом эттирмоқда

Самарқанд вилоятининг Нарпай тумани халқ таълими бўлимида кадрлар бўйича инспектор лавозимида ишлаб келаётган Ғулом Исмоилов 15 нафар ўқитувчи малака аттестациясидан ўтмаган бўлса-да, уларнинг аттестациядан ўтганлигини тасдиқловчи сохта ҳужжат тайёрлаган. Ҳамда 2018/2019-ўқув йилида 23 миллион 519 минг сўм иш ҳақи ноқонуний тўланиб, бюджет маблағлари талон-торож қилинишига сабабчи бўлган. Бу ҳақда «Дарё» мухбири Фарҳод Норбўтаев хабар берди.

Маълум бўлишича, ХТБнинг кадрлар бўйича инспектори Ғулом Исмоилов 2018 йил июнь ойида мутасадди ташкилотларга 15 нафар ўқитувчи аттестациядан ўтмаган бўлса-да, «улар аттестациядан ўтди» деган ёлғон маълумот берган. Ҳамда қатъий ҳисобда турувчи расмий ҳужжат ҳисобланган педагог кадрларнинг аттестациядан ўтганлиги тўғрисидаги сертификатларни сохталаштирган.

2020 йил 10 февраль куни Жиноят ишлари бўйича Нарпай туман судида сўз олган Ғулом Исмоилов ўз айбига тўлиқ иқрорлигини билдириб, жиноий мақсадига эришиш йўлида кадрлар бўлимига тегишли муҳр билан сохта жадваллар тузганлигини, сўнгра уларни мактаб директорларига тақдим қилганлигини айтган.

ХТБ масъулининг қилмиши сабаб аттестациядан ўтмаган ўқитувчиларнинг тоифа сертификатлар олганлиги ҳақида тарификация тузилган ва ўқитувчиларнинг иш ҳақларига ноқонуний малака устамалари қўшиб берилган.

Ғулом Исмоилов ишини кўриб чиққан суд уни Жиноят кодексининг 167-моддаси 2-қисми «г» банди (Мансаб мавқейини суиистеъмол қилиш йўли билан ўзлаштириш ёки растрата йўли билан талон-торож қилиш), 228-моддаси (Ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан айбли деб топиб, 1 йил 6 олти ой муддатга мансабдор ва моддий жавобгар шахс лавозимларида ишлаш ҳуқуқидан маҳрум қилган. Шунингдек, ҳар ойда иш ҳақи даромадининг 20 фоиз миқдорида давлат фойдасига ундириш шарти билан 1 йил 6 олти ой муддатга ахлоқ тузатиш ишларига жалб қилинган.

«Дарё» мухбирининг аниқлаштиришича, суд ҳукми билан 2020 йил 10 февралдан бошлаб 1 йил 6 олти ой муддатга мансабдор ва моддий жавобгар шахс лавозимларида ишлаш ҳуқуқидан маҳрум қилинган Ғулом Исмоилов айни пайтда туман ХТБда ўз фаолиятини давом эттирмоқда.

Эслатиб ўтамиз, аввалроқ тумандаги мактаб ўқитувчилари рўза пайтида мактаб ҳожатхоналарини тозалашга жалб қилингани ҳақида хабар берилганди. Кейинчалик ҳоким номидан топшириқ бериб, ўқитувчиларни ҳожатхона тозалашга мажбур қилган шахс ХТБ мудири Мирзоҳид Йўлдошев эканлиги маълум бўлди.

«Дарё»га тақдим этилган аудиода мудир директорлардан «Саховат ва кўмак» ҳаракати учун 100 минг сўмдан пул ўтказишни сўралганлиги ҳам ойдинлашганди. Шундан сўнг, ўқитувчиларни ҳожатхона таъмирлашга мажбур қилган ХТБ мудири ишдан олинди.