Adliya vaziri o‘rinbosari Bahrom Qo‘chqorov Davlat xizmati to‘g‘risidagi qonun shu vaqtgacha nega qabul qilinmagani yuzasidan savollarga javob berdi. Bu haqda u Adliya vazirligida tashkil etilgan “Davlat fuqarolik xizmati to‘g‘risida”gi qonun loyihasi muhokamasiga bag‘ishlangan matbuot anjumanida to‘xtalib o‘tdi, deya xabar berdi “Daryo” muxbiri.
Xususan, vazir o‘rinbosari 2017—2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasi asosida nafaqat qonun tarafdan davlat xizmatini tartibga solish, balki davlat xizmatini tubdan isloh qilishni boshlab berganini qayd etdi.
“Davlat xizmatini tartibga solish, qonun loyihasini ishlab chiqish kecha boshlangan ish emas. Bu 1990-yillarga borib taqaladi, o‘sha vaqtlarda ham qonun loyihalari bir necha bor ishlangan, 2005-yilda ham xalqaro ekspertlar boshchiligida ko‘plab loyihalar qilindi. Lekin idoralararo yoki ekspertlar muhokamasidan o‘tmagan. Buni qabul qilishga siyosiy iroda yo‘q edi. 2017-yilda Prezidentning siyosiy irodasi bilan strategiya qabul qilindi”, — deydi Qo‘chqorov.
2019-yilning 3-oktabridagi O‘zbekiston Respublikasida kadrlar siyosati va davlat fuqarolik xizmati tizimini tubdan takomillashtirish chora-tadbirlari to‘g‘risida”gi farmoni va “O‘zbekiston Respublikasi Prezidenti huzuridagi Davlat xizmatini rivojlantirish agentligi faoliyatini tashkil etish chora-tadbirlari to‘g‘risida”gi qaroriga ko‘ra qonun loyihasi nufuzli xorijiy tashkilotlari mutaxassis va ekspertlarining tavsiyalari asosida ishlab chiqilgani, keng jamoatchilik fikri muhokamasi bilan qonun takomillashtirilishi ta’kidlandi.
Shuningdek, brifingda loyiha haqida Davlat xizmatini rivojlantirish agentligi direktor o‘rinbosari Nodirjon Maksumov ham fikrini bildirib o‘tgan.
Jumladan, Maksumov Prezidentning 2017-yilda Parlamentga qilgan murojaatida davlat fuqarolik xizmati to‘g‘risidagi chaqirig‘iga asosan Davlat xizmatini rivojlantirish agentligi tomonidan “Davlat fuqarolik xizmati to‘g‘risida”gi qonun loyihasi ishlab chiqilganini qayd etdi. Shu yilning 22-may kuni jamoatchilik muhokamasiga qo‘yilgan loyiha bo‘yicha jami 1001 dan ortiq murojaatlar kelib tushgan. Loyihada MDH mamlakatlari, Singapur, Yaponiya, Janubiy Koreya, Yevropa tajribasi ko‘rilgan.
Loyiha davlat hokimiyati va boshqaruv organlarini yuqori malakali kadrlar bilan ta’minlash, ular bilan doimiy ishlash, malakasini oshirib borish, ularning mas’uliyati, mutaxassislar zaxirasini shakllantirish masalalarini hal etish uchun asos bo‘lishini gapirib o‘tdi. Loyiha bilan davlat fuqarolik xizmatchisi huquqiy maqomi, xizmatning tashkiliy-huquqiy asoslarini yaratish, kasbga oid sifatlari, alohida xizmatlarini obyektiv tanlov asosida xizmat pog‘onalarida o‘sish kafolatlarini o‘rnatish, davlat fuqarolik xizmatiga kirish, o‘tash va tugatish jarayonlarini tartibga solish munosabatlarning barchasi nazarda tutilgan. Loyihaga berilayotgan taklif-munozaralar, savollar mutaxassislar hamda vazirlik-idoralardan mas’ullar ishtirokida yana bir marta ko‘rib chiqilishi, zarur bo‘lganda o‘zgartish va qo‘shimchalar kiritilishi bildirildi.
Izoh (0)