Janubiy Koreya koronavirusga qarshi kurashda yordam uchun O‘zbekistonga oltinchi marta insonparvarlik yordami yubordi

Joriy yilning 4-iyun kuni Janubiy Koreyadan O‘zbekistonga oltinchi marta insonparvarlik yordami yuborildi. Bu haqda “Dunyo” agentligi xabar berdi.

Ma’lum qilinishicha, ushbu moddiy yordam Janubiy Koreyaning “BOMI Engineering & Construction” kompaniyasi tomonidan taqdim etilgan.

Uzbekistan Airways’ning charter yuk reysi orqali jo‘natilgan yuk tarkibidan 32 dona ko‘p funksiyali avtomatlashtirilgan tibbiy karavot va to‘shaklar o‘rin olgan.

Joriy yilning aprel—iyun oylarida Janubiy Koreyadan O‘zbekistonga umumiy hajmi 27,5 tonnadan iborat 1,2 million dollar miqdoridagi yuqori samarali va ko‘chma tibbiy asbob-uskunalar hamda himoya vositalari yuborildi.

Eslatib o‘tamiz, Janubiy Koreyadan insonparvarlik yordamining birinchi partiyasi aprel oyi oxirlarida, ikkinchi partiyasi esa may oyi o‘rtalarida yuborilgan edi. Shuningdek, 23-may, 27-may, 2-iyun kunlari ham mazkur mamlakatdan insonparvarlik yordamlari qabul qilindi.