Жанубий Корея коронавирусга қарши курашда ёрдам учун Ўзбекистонга олтинчи марта инсонпарварлик ёрдами юборди

Жорий йилнинг 4 июнь куни Жанубий Кореядан Ўзбекистонга олтинчи марта инсонпарварлик ёрдами юборилди. Бу ҳақда «Дунё» агентлиги хабар берди.

Маълум қилинишича, ушбу моддий ёрдам Жанубий Кореянинг «BOMI Engineering & Construction» компанияси томонидан тақдим этилган.

Uzbekistan Airways’нинг чартер юк рейси орқали жўнатилган юк таркибидан 32 дона кўп функцияли автоматлаштирилган тиббий каравот ва тўшаклар ўрин олган.

Жорий йилнинг апрель—июнь ойларида Жанубий Кореядан Ўзбекистонга умумий ҳажми 27,5 тоннадан иборат 1,2 миллион доллар миқдоридаги юқори самарали ва кўчма тиббий асбоб-ускуналар ҳамда ҳимоя воситалари юборилди.

Эслатиб ўтамиз, Жанубий Кореядан инсонпарварлик ёрдамининг биринчи партияси апрель ойи охирларида, иккинчи партияси эса май ойи ўрталарида юборилган эди. Шунингдек, 23 май, 27 май, 2 июнь кунлари ҳам мазкур мамлакатдан инсонпарварлик ёрдамлари қабул қилинди.