O‘zbekiston biznes-ombudsmani Davlat soliq qo‘mitasini ogohlantirdi. Bu haqda Prezident huzuridagi Tadbirkorlik subyektlarining huquqlari va qonuniy manfaatlarini himoya qilish bo‘yicha vakil saytida ma’lum qilingan.
Bunga tahlillar natijasida 4 208 nafar tadbirkorlarga bugungi kunga qadar to‘lanmagan 145,5 milliard so‘m asosiy qarzdorlik va ushbu qarzdorlikka nisbatan 3,7 milliard so‘m qiymatidagi penyalar hisoblangani aniqlangani sabab bo‘lgan.
Avval xabar berilganidek, Prezident farmoni bilan koronavirus pandemiyasi sharoitida tadbirkorlik subyektlariga tadbirkorlik subyektlariga qator imtiyoz va yengilliklar berilgan. Xususan, mazkur huquqiy hujjatlarga ko‘ra, tadbirkorlik subyektlariga nisbatan foydalanilmayotgan ishlab chiqarish maydonlari, yashash uchun mo‘ljallanmagan inshootlar, shu jumladan, 2020-yil 1-aprelga qadar aniqlanganlarga nisbatan mol-mulk solig‘i va yer solig‘ining oshirilgan stavkalarini qo‘llash, shuningdek, ko‘rsatilgan soliqlar bo‘yicha oshirilgan stavkalarni qo‘llash natijasida yuzaga kelgan qarzdorlikka nisbatan penya hisoblash va majburiy undirish choralarini ko‘rish tartibi 2020-yil 1-apreldan 31-dekabrga qadar to‘xtatilishi belgilangandi.
Natijada Davlat soliq qo‘mitasi bilan hamkorlikda ta’sirchan soliq qo‘llash natijasida tadbirkorlarning bank hisobvaraqalariga qo‘yilgan inkasso topshiriqnomalari chaqirtirib olingan hamda mazkur turda chiqarilgan sud qarorlari ijrosini 2020-yil 31-dekabrga qadar to‘xtatish to‘g‘risida sudlarga iltimosnomalar kiritilgan.
Mazkur holat bo‘yicha DSQning ma’lum qilishicha, oshirilgan stavkalarni qo‘llash, penya hisoblash va majburiy undirish kabi ta’sirchan choralarni to‘xtatish DSQ tomonidan tegishli dasturiy mahsulotga o‘zgartirish kiritish orqali avtomatik tarzda amalga oshiriladi. Bu esa imtiyozlarni qo‘llash shaffoflik va adolat tamoyillari asosida amalga oshirilishini ta’minlaydi.
Ta’sirchan soliq qo‘llash natijasida yuzaga kelgan 145,5 milliard so‘m miqdoridagi soliq qarzi bo‘yicha 4 208 ta tadbirkorlik subyektining bank hisobvaraqalarida ijroda turgan inkasso topshiriqnomalari ogohlantirishga qadar DSQ tomonidan markazlashgan holda chaqirtirib olingan.
Xabarda keltirilgan 3,7 milliard so‘m miqdoridagi penya esa farmon qabul qilingunga qadar hisoblangan bo‘lib, soliq xizmati organlari tomonidan mazkur summani undirish choralari to‘liq to‘xtatilgan.
Hududiy soliq organlari tomonidan mazkur soliq turidan mavjud qarzdorliklar bo‘yicha ijro organlari ish yurituvida bo‘lgan 14,1 milliard so‘mlik 251 ta sud hujjati ijrosini 2020-yil 31-dekabrga qadar to‘xtatish to‘g‘risida sudlarga iltimosnomalar kiritilishi ta’minlangan.
Izoh (0)