Andijon viloyatining Izboskan tumanida 20 ming aholiga xizmat qiluvchi 73 metr uzunlikdagi yangi ko‘prik foydalanishga topshirildi. Bu haqda xabar bergan “Daryo” muxbirining aytishicha, mazkur ko‘prik 50 yil avval sel yuvib ketishi oqibatida yaroqsiz holga kelgan.
Ta’kidlanishicha, mazkur ko‘prik “Anorzor” va “Beshtarak” mahallalarini bog‘lab turgan.
“Anorzor” mahalla fuqarolar yig‘ini raisi O‘g‘ilxon Hayitovaning aytishicha, osma temir ko‘prikning yaroqsizligi bois sel toshqinlari paytida aholini xavfsiz hududlarga ko‘chirish borasida bir qancha muammolar yuzaga kelgan.
“Mahalla nuroniylari 2019-yil viloyat hokimi Shuhrat Abdurahmonovga murojaat qilib, mazkur masalada ko‘mak so‘rashgandi. Shundan so‘ng o‘tgan yilning yoz oylarida avtomobillar va piyodalar foydalanadigan yangi ko‘prik qurilishi boshlab yuborilgandi”, — deydi MFY raisi.
Ma’lumot berilishicha, Tentaksoy ustidan o‘tuvchi mazkur ko‘prikning uzunligi 73 metr, eni esa 10 metr bo‘lib, ko‘prik qurilishi uchun 6 milliard 734 million so‘m mablag‘ sarflangan.
Ko‘prik qurilishi natijasida Paxtaoboddan Andijon shahrigacha bo‘lgan masofa 15 kilometrga qisqargan.
“Sel toshqinlariga yaroqli ko‘prigimiz bo‘lishini orzu qilardik. Bizdan oldin ota-bobolarimiz ham harakat qilishgan, lekin natija bo‘lmagan. Ko‘p yillik yugur-yugurlardan so‘ng yangi ko‘prikka ega bo‘ldik. Endi bu ko‘prikdan nafaqat anorzorliklar balki, ‘Gurkirov’, ‘Beshtarak’, Paxtaobod tumanining ‘Xayrobod’ va ‘Shuvoqzor’ mahallalarida yashovchi 20 ming aholi ham bemalol foydalanishi mumkin”, — deydi Husanboy ota Orifjonov.
Mavzuga doir:
- Qamashida avariya holatidagi ko‘prikning yana bir tomonini sel yuvib ketdi. Qashqadaryo hokimligi uni ta’mirlash haqida yetti oy avval va’da bergandi
- Qashqadaryoda homiladorlarni tug‘ruqxonaga yetkazish uchun daryodan zambilda olib o‘tiladigan, jin ko‘prikdan yiqilganlar esa nogiron bo‘lib qolayotgan qishloq bor
Izoh (0)