Toshkent tibbiyot akademiyasi (ToshTA) ko‘p tarmoqli klinikasida 24-aprel kuni olti nafar bemor koronavirusdan sog‘ayib, reabilitatsiyaga kuzatildi. Sog‘liqni saqlash vazirligi (SSV)dan ma’lum qilishlarcha, bu bemorlarning bari kasallikni koronavirusga chalinganlar bilan muloqot vaqtida yuqtirib olgan edi.
“Bemorlardan uch nafari erkak, yana uch nafari ayollardir. Ulardan besh nafari Toshkent shahridan, bir nafari Qashqadaryo viloyatidan. Eng yoshi kattasi 27 da bo‘lsa, eng kichigi 10 yoshda, ular orasida 22 yoshli egizak aka-uka ham bor”, — deyiladi SSV axborotida. Qayd etishlaricha, bungacha ToshTA klinikasida 42 bemor sog‘aygan edi.
Avvalroq 24-aprel hisobidan Qashqadaryoda ikki kishi, Farg‘ona viloyatida 19 kishi (ular orasida uch oylik chaqaloq ham bor), Toshkentda esa 10 kishi — jami 31 kishi koronavirusdan sog‘aygani ma’lum qilingan edi. Shunday qilib, O‘zbekiston bo‘yicha koronavirus infeksiyasidan butunlay sog‘ayganlar soni 24-aprel soat 13:30 holatiga ko‘ra 598 nafarni tashkil etmoqda.
Eslatib o‘tamiz, 24 aprel soat 10:00 holatiga ko‘ra O‘zbekistonda koronavirus infeksiyasini yuqtirib olish bilan bog‘liq 1778 ta holat aniqlangan, bemorlarning yetti nafari vafot etgan.
Izoh (0)