“Daryo” oqshomi: koronavirus pandemiyasi bo‘yicha 22-aprelning asosiy xabarlari

Jahondagi vaziyat

Jons Hopkins universitetining Toshkent vaqti bilan soat 20:30 dagi ma’lumotlariga ko‘ra:

• dunyo bo‘yicha infeksiya bilan kasallanganlar — 2 593 129 kishi;
• kasallikdan tuzalganlar — 696 948 kishi;
• infeksiya oqibatida vafot etganlar — 179 725 kishi.

So‘nggi ma’lumotlarga ko‘ra, AQShda koronavirus bilan kasallanganlar soni 825 ming kishidan oshib ketdi. Mamlakat COVID-19 bilan kasallanganlar soni bo‘yicha dunyoda birinchi o‘rinda ketmoqda. Koronavirus oqibatida vafot etganlar soni 45 063 kishiga yetdi.

Eron Islom Respublikasida 21-aprel holati bo‘yicha koronavirusni yuqtirib olganlar soni 84 802 nafarni tashkil qilmoqda. 60 695 nafar bemor kasallikdan tuzalgani ma’lum qilindi. 19-fevral kuni mamlakatda koronavirus tarqalgani e’lon qilganidan beri kasallik oqibatida vafot etganlarning soni 5297 nafarga yetgan.

Rossiyada koronavirus bilan kasallanganlarning jami soni 57 999 kishiga yetdi. Mamlakatda pandemiya boshlanganidan buyon koronavirus oqibatida vafot etganlar soni 513 kishiga yetdi, 4420 kishi davolanishga muvaffaq bo‘ldi.

Qozog‘istonda 22-aprel holatiga ko‘ra, koronavirus bilan kasallanganlar soni 2025 kishiga yetdi. Mamlakatda COVID-19 koronavirus infeksiyasi tarqalishi boshlanganidan buyon 19 kishi virus qurboniga aylangan, shuningdek, 489 bemor davolanishga muvaffaq bo‘lgan.

Qirg‘izistonda COVID-19 bilan kasallanganlarning jami soni 612 kishini tashkil etmoqda. Mamlakatda pandemiya boshlanganidan buyon 7 kishi COVID-19 qurboniga aylandi. Hozirga qadar 254 kishi davolanishga muvaffaq bo‘lgan.

O‘zbekistondagi vaziyat

22-aprel soat 10:00 holatiga ko‘ra O‘zbekistonda koronavirus infeksiyasini yuqtirib olganlar soni 1692 nafarni tashkil etmoqda.

Namanganda koronavirus infeksiyasi aniqlangan 54 yoshli bemor (ayol) 22-aprel kuni o‘tkir nafas va yurak qon-tomir yetishmovchiligidan vafot etdi. U  14-aprel kuni og‘ir ahvolda viloyat yuqumli kasalliklar shifoxonasiga yotqizilgan edi. Zudlik bilan amalga oshirilgan laborator tahlil natijasida unda koronavirus infeksiyasi borligi tasdiqlangan. Bemor oldin ham gipertoniya va qandli diabet tashxisi bilan surunkali kasallanib kelgan.

O‘zbekistonda koronavirusdan tuzalganlar soni 450 nafarga yetdi. Toshkentda 2020-yilda tug‘ilgan chaqaloq kasallikdan sog‘aydi.

O‘zbekiston bo‘yicha asosiy ma’lumotlar

O‘zbekistonning koronavirus qayd etilmagan hududlarida sanoat korxonalari va klasterlar o‘z ishini qayta boshladi. Shavkat Mirziyoyev dalalarda, tomorqalarda mehnat qilayotgan dehqon va fermerlarga, klaster xo‘jaliklari rahbarlari va ishchi-xizmatchlarga minnatdorchlik bildirdi.

Mirziyoyev va Erdo‘g‘on koronavirus tarqalishiga qarshi kurashishda yaqindan hamkorlik qilish niyatida. Ushbu masalani tezkor hal qilish uchun o‘zaro muvofiqlashgan tarzda ishlash maqsadida yaqin kunlarda Turkiy kengash mamlakatlari sog‘liqni saqlash va transport vazirliklari rahbarlarining turkum onlayn-uchrashuvlari bo‘lib o‘tadi.

Shavkat Mirziyoyev O‘zbekistonda koronavirusga qarshi kurashayotgan shifokorlar va kuch tuzilmalariga minnatdorchilik bildirdi. “Ko‘rilayotgan chora-tadbirlarni keng qo‘llab-quvvatlayotgan barcha yurtdoshlarimizga yana bir marta rahmat aytaman”, — dedi Prezident.

O‘zbekistonga kelgan xitoylik shifokorlarning 11 nafari 21-aprel, seshanba kuni, Andijondagi holat bilan tanishib, viloyat shifokorlari bilan tajriba almashdi. Qo‘shimcha qilinishicha, xitoylik shifokorlar shu kunning o‘zida Namangan viloyatiga jo‘nab ketgan.

Karantin vaqtida teledarslar o‘tayotgan o‘qituvchilar Toshkentdagi Prezident maktabiga joylashtirildi. Loyihaning barcha 158 nafar ishtirokchisi koronavirusni aniqlash bo‘yicha virusologik tekshiruvdan o‘tkazildi va test natijalariga asosan Prezident maktabiga joylashtirildi.

Jizzaxda karantin vaqtida faoliyat yuritgan kompyuterxona egasi jazolandi. Oliy va o‘rta maxsus ta’lim vazirligi: Qo‘shni davlatlardan o‘qishini ko‘chirish uchun hujjatlarini topshirgan talabalarning natijalari yaqin kunlarda tasdiqlanishini ma’lum qildi. O‘zbekiston Markaziy banki valyutada kredit olganlarning zararlarini qoplab bermasligini ma’lum qildi. Ta’kidlanishicha, banklar 48,1 foiz kreditlarni xorijiy valyutada taqdim etgan.

Jahonda nima gap?

Jahon sog‘liqni saqlash tashkilotining Rossiyadagi vakili Melita Vuynovich COVID-19 bilan kasallanganlarning vafoti haqidagi hisob-kitoblar bemorda boshqa kasalliklar uchragan bo‘lsa ham koronavirusdan qayd etilgan, deb hisobga olinayotganini ma’lum qildi. Qo‘shimcha qilinishicha, epidemiya ortda qolganidan keyin ushbu masala qayta o‘rganiladi.

Amerikaning Missuri shtati koronavirus sabab Xitoyni sudga berdi. Da’voda javobgar tomon sifatida Xitoy hukumati, mamlakat kommunistik partiyasi va Xitoyning boshqa mansabdor shaxslari hamda davlat muassasalari ko‘rsatilgan.

Taxminlarga ko‘ra, AQShda koronavirusning ikkinchi to‘lqini birinchisidan ham xatarli bo‘lishi mumkin. Koronavirusning yangi to‘lqini mavsumiy gripp epidemiyasiga to‘g‘ri kelishi mumkinligi aytilmoqda.

Tramp immigrantlarning AQShga kirishi ikki oyga to‘xtatilganini ma’lum qildi. “Bu koronavirus pandemiyasi sabab yuzaga kelgan inqiroz oqibatida ishsiz qolgan amerikaliklarni himoya qilishga yordam beradi“, — degan prezident.

Moskvada koronavirus bilan kasallangan shifokor vafot etdi. Maksim Starinskiyning vafoti — COVID-19 bilan kasallangan bemorlarni davolayotgan shifokorlar orasida kuzatilgan birinchi o‘lim holati.

Moskva meri koronavirus belgilari bor shaxslar bilan yashayotganlarning ko‘chaga chiqishiga ruxsat berdi. Bundan tashqari, hukumat O‘RVI belgilariga ega bo‘lgan fuqarolarning geolokatsiyasini kuzatib boradi.

Professor, Rossiyada xizmat ko‘rsatgan shifokor Aleksandr Karabinenko koronavirus bilan kasallangan odamlarni davolaydigan shifokorlar qiyin sharoitlarda ishlashga majbur bo‘layotgani haqida ma’lum qilgan. “Ularning mehnat sharoitlari ham juda og‘ir, chunki tagliklarda kuniga 12 soat uzluksiz ishlashga to‘g‘ri keladi. Yeb-ichish ham yo‘q. Bu — juda mashaqqatli ish”, — degan Karabinenko va buning uchun shifokorlarga munosib haq to‘lash kerakligini aytgan.

“Pandemiyadan keyin dunyo asl holiga qaytmaydi”. Telegram asoschisi Pavel Durov koronavirusdan keyingi hayot haqida fikr bildirib, yaqin vaqtlarda paydo bo‘ladigan yangi dunyo biz ortda qoldirayotgandanda yaxshiroq bo‘lishi o‘zimizga bog‘liq ekanligini aytdi.

Xitoyning Chjeszyan universiteti olimlarining aniqlashicha, SARS-CoV-2 koronavirusi keltirib chiqaradigan COVID-19 kasalligi patogenning shtammiga qarab kasallik og‘irroq yoki yengilroq kechishi mumkin. Tadqiqot doirasida ular turli shtammlarning inson hujayralariga qanchalik tez kirib borishi va ularni nobud qilishi mumkinligini aniqlagan. Natijada, kasallik qo‘zg‘atuvchi tajovuzkor shtammlar mavjudligi tasdiqlandi, ularning virus yuki eng zaif shtammlarga qaraganda 270 baravargacha yuqori bo‘lishi mumkin.