Andijonda sanitariya-epidemiologik osoyishtalik markazlariga 14 ta xizmat avtomobili topshirildi. Bu haqda “Daryo” muxbiri Umidjon Mamarasulov xabar bermoqda.
2020-yil 21-aprel kuni viloyat hokimi Shuhrat Abdurahmonov sanitariya-epidemiologik osoyishtalik markazi xodimlari bilan uchrashgan. Hokim karantin davrida markaz xodimlari zimmasiga har doimgidan ham ko‘p vazifalar yuklatilganini ta’kilab, ular bu mas’uliyatni a’lo darajada ado etayotganini bildirgan. Hamda Prezident tomonidan yuborilgan xizmat avtomobillari kalitini topshirgan.
Ma’lum bo‘lishicha, viloyat sanitariya-epidemiologik osoyishtalik markaziga (SEOM) 2 ta Nexia-3, shahar va tuman bo‘limlariga esa 12 ta Damas berilgan.
Viloyat SEOM bosh shifokori Dilmurod Nabiyevning aytishicha, Bo‘z, Oltinko‘l, Shahrixon tumanlari shu kunga qadar xizmat avtomobillariga ega bo‘lmagan. Asaka, Buloqboshi, Paxtaobod va boshqa tumanlar 1997-yilda sotib olingan va eskirgan xizmat avtomobillaridan foydalanib kelgan.
Xabar qilinishicha, viloyat hokimi tashabbusi bilan joylarda xizmat olib borayotgan ish stavkasi 0,25 va 0,5 stavkada faoliyat yuritayotgan xodimlarning to‘liq stavkada ishlashi uchun mahalliy budjet mablag‘lari hisobidan 1 milliard 450 million so‘m qo‘shimcha mablag‘ ajratilishi belgilangan. Shu mablag‘ning 448 million so‘mi bugun, 22-aprel kuni, markaz hisob raqamiga kelib tushgan.
Izoh (0)