«Дарё» оқшоми: коронавирус пандемияси бўйича 22 апрелнинг асосий хабарлари

Жаҳондаги вазият

Жонс Ҳопкинс университетининг Тошкент вақти билан соат 20:30 даги маълумотларига кўра:

• дунё бўйича инфекция билан касалланганлар — 2 593 129 киши;
• касалликдан тузалганлар — 696 948 киши;
• инфекция оқибатида вафот этганлар — 179 725 киши.

Сўнгги маълумотларга кўра, АҚШда коронавирус билан касалланганлар сони 825 минг кишидан ошиб кетди. Мамлакат COVID-19 билан касалланганлар сони бўйича дунёда биринчи ўринда кетмоқда. Коронавирус оқибатида вафот этганлар сони 45 063 кишига етди.

Эрон Ислом Республикасида 21 апрель ҳолати бўйича коронавирусни юқтириб олганлар сони 84 802 нафарни ташкил қилмоқда. 60 695 нафар бемор касалликдан тузалгани маълум қилинди. 19 февраль куни мамлакатда коронавирус тарқалгани эълон қилганидан бери касаллик оқибатида вафот этганларнинг сони 5297 нафарга етган.

Россияда коронавирус билан касалланганларнинг жами сони 57 999 кишига етди. Мамлакатда пандемия бошланганидан буён коронавирус оқибатида вафот этганлар сони 513 кишига етди, 4420 киши даволанишга муваффақ бўлди.

Қозоғистонда 22 апрель ҳолатига кўра, коронавирус билан касалланганлар сони 2025 кишига етди. Мамлакатда COVID-19 коронавирус инфекцияси тарқалиши бошланганидан буён 19 киши вирус қурбонига айланган, шунингдек, 489 бемор даволанишга муваффақ бўлган.

Қирғизистонда COVID-19 билан касалланганларнинг жами сони 612 кишини ташкил этмоқда. Мамлакатда пандемия бошланганидан буён 7 киши COVID-19 қурбонига айланди. Ҳозирга қадар 254 киши даволанишга муваффақ бўлган.

Ўзбекистондаги вазият

22 апрель соат 10:00 ҳолатига кўра Ўзбекистонда коронавирус инфекциясини юқтириб олганлар сони 1692 нафарни ташкил этмоқда.

Наманганда коронавирус инфекцияси аниқланган 54 ёшли бемор (аёл) 22 апрель куни ўткир нафас ва юрак қон-томир етишмовчилигидан вафот этди. У  14 апрель куни оғир аҳволда вилоят юқумли касалликлар шифохонасига ётқизилган эди. Зудлик билан амалга оширилган лаборатор таҳлил натижасида унда коронавирус инфекцияси борлиги тасдиқланган. Бемор олдин ҳам гипертония ва қандли диабет ташхиси билан сурункали касалланиб келган.

Ўзбекистонда коронавирусдан тузалганлар сони 450 нафарга етди. Тошкентда 2020 йилда туғилган чақалоқ касалликдан соғайди.

Ўзбекистон бўйича асосий маълумотлар

Ўзбекистоннинг коронавирус қайд этилмаган ҳудудларида саноат корхоналари ва кластерлар ўз ишини қайта бошлади. Шавкат Мирзиёев далаларда, томорқаларда меҳнат қилаётган деҳқон ва фермерларга, кластер хўжаликлари раҳбарлари ва ишчи-хизматчларга миннатдорчлик билдирди.

Мирзиёев ва Эрдўғон коронавирус тарқалишига қарши курашишда яқиндан ҳамкорлик қилиш ниятида. Ушбу масалани тезкор ҳал қилиш учун ўзаро мувофиқлашган тарзда ишлаш мақсадида яқин кунларда Туркий кенгаш мамлакатлари соғлиқни сақлаш ва транспорт вазирликлари раҳбарларининг туркум онлайн-учрашувлари бўлиб ўтади.

Шавкат Мирзиёев Ўзбекистонда коронавирусга қарши курашаётган шифокорлар ва куч тузилмаларига миннатдорчилик билдирди. «Кўрилаётган чора-тадбирларни кенг қўллаб-қувватлаётган барча юртдошларимизга яна бир марта раҳмат айтаман», — деди Президент.

Ўзбекистонга келган хитойлик шифокорларнинг 11 нафари 21 апрель, сешанба куни, Андижондаги ҳолат билан танишиб, вилоят шифокорлари билан тажриба алмашди. Қўшимча қилинишича, хитойлик шифокорлар шу куннинг ўзида Наманган вилоятига жўнаб кетган.

Карантин вақтида теледарслар ўтаётган ўқитувчилар Тошкентдаги Президент мактабига жойлаштирилди. Лойиҳанинг барча 158 нафар иштирокчиси коронавирусни аниқлаш бўйича вирусологик текширувдан ўтказилди ва тест натижаларига асосан Президент мактабига жойлаштирилди.

Жиззахда карантин вақтида фаолият юритган компьютерхона эгаси жазоланди. Олий ва ўрта махсус таълим вазирлиги: Қўшни давлатлардан ўқишини кўчириш учун ҳужжатларини топширган талабаларнинг натижалари яқин кунларда тасдиқланишини маълум қилди. Ўзбекистон Марказий банки валютада кредит олганларнинг зарарларини қоплаб бермаслигини маълум қилди. Таъкидланишича, банклар 48,1 фоиз кредитларни хорижий валютада тақдим этган.

Жаҳонда нима гап?

Жаҳон соғлиқни сақлаш ташкилотининг Россиядаги вакили Мелита Вуйнович COVID-19 билан касалланганларнинг вафоти ҳақидаги ҳисоб-китоблар беморда бошқа касалликлар учраган бўлса ҳам коронавирусдан қайд этилган, деб ҳисобга олинаётганини маълум қилди. Қўшимча қилинишича, эпидемия ортда қолганидан кейин ушбу масала қайта ўрганилади.

Американинг Миссури штати коронавирус сабаб Хитойни судга берди. Даъвода жавобгар томон сифатида Хитой ҳукумати, мамлакат коммунистик партияси ва Хитойнинг бошқа мансабдор шахслари ҳамда давлат муассасалари кўрсатилган.

Тахминларга кўра, АҚШда коронавируснинг иккинчи тўлқини биринчисидан ҳам хатарли бўлиши мумкин. Коронавируснинг янги тўлқини мавсумий грипп эпидемиясига тўғри келиши мумкинлиги айтилмоқда.

Трамп иммигрантларнинг АҚШга кириши икки ойга тўхтатилганини маълум қилди. «Бу коронавирус пандемияси сабаб юзага келган инқироз оқибатида ишсиз қолган америкаликларни ҳимоя қилишга ёрдам беради«, — деган президент.

Москвада коронавирус билан касалланган шифокор вафот этди. Максим Старинскийнинг вафоти — COVID-19 билан касалланган беморларни даволаётган шифокорлар орасида кузатилган биринчи ўлим ҳолати.

Москва мэри коронавирус белгилари бор шахслар билан яшаётганларнинг кўчага чиқишига рухсат берди. Бундан ташқари, ҳукумат ЎРВИ белгиларига эга бўлган фуқароларнинг геолокациясини кузатиб боради.

Профессор, Россияда хизмат кўрсатган шифокор Александр Карабиненко коронавирус билан касалланган одамларни даволайдиган шифокорлар қийин шароитларда ишлашга мажбур бўлаётгани ҳақида маълум қилган. «Уларнинг меҳнат шароитлари ҳам жуда оғир, чунки тагликларда кунига 12 соат узлуксиз ишлашга тўғри келади. Еб-ичиш ҳам йўқ. Бу — жуда машаққатли иш», — деган Карабиненко ва бунинг учун шифокорларга муносиб ҳақ тўлаш кераклигини айтган.

«Пандемиядан кейин дунё асл ҳолига қайтмайди». Telegram асосчиси Павел Дуров коронавирусдан кейинги ҳаёт ҳақида фикр билдириб, яқин вақтларда пайдо бўладиган янги дунё биз ортда қолдираётганданда яхшироқ бўлиши ўзимизга боғлиқ эканлигини айтди.

Хитойнинг Чжэцзянь университети олимларининг аниқлашича, SARS-CoV-2 коронавируси келтириб чиқарадиган COVID-19 касаллиги патогеннинг штаммига қараб касаллик оғирроқ ёки енгилроқ кечиши мумкин. Тадқиқот доирасида улар турли штаммларнинг инсон ҳужайраларига қанчалик тез кириб бориши ва уларни нобуд қилиши мумкинлигини аниқлаган. Натижада, касаллик қўзғатувчи тажовузкор штаммлар мавжудлиги тасдиқланди, уларнинг вирус юки энг заиф штаммларга қараганда 270 бараваргача юқори бўлиши мумкин.