IIV xabariga ko‘ra, O‘zbekistonda karantin tadbirlari e’lon qilingan vaqtdan bugungi kunga qadar belgilangan qoidalarga amal qilmaslik bilan bog‘liq jami 83 005 ta holat aniqlandi.
Qayd etilishicha, eng ko‘p — 15 198 ta qoidabuzarlik Toshkent shahrida. Xususan, 19-aprel kuni Toshkent shahri, Yunusobod tumani, 2-mavzeda yashovchi 1978-yilda tug‘ilgan E.K. 24-uy oldida karantin qoidalariga zid ravishda somsa savdosi bilan shug‘ullanayotganligi aniqlangan.
Shaharning Mirzo Ulug‘bek tumani, Tohir Malik ko‘chasida yashovchi 1995-yilda tug‘ilgan A.Yu. esa karantin qoidalarini buzib, Yunusobod tumanida joylashgan “Nurika” kafesida faoliyat olib borayotganligi aniqlangan.
Har ikki holat yuzasidan Ma’muriy javobgarlik to‘g‘risidagi kodeksning 54-moddasi (Epidemiyalarga qarshi kurash qoidalarini buzish) bo‘yicha hujjatlar rasmiylashtirilgan. Respublikaning boshqa hududlarida aniqlangan qoidabuzarliklar soni esa quyidagicha:
- Farg‘ona viloyatida – 13 179 ta;
- Toshkent viloyatida – 12 261 ta;
- Samarqand viloyatida – 7 251 ta;
- Sirdaryo viloyatida – 5 635 ta;
- Qashqadaryo viloyatida – 5 300 ta;
- Andijon viloyatida – 4 723 ta;
- Namangan viloyatida – 4 598 ta;
- Buxoro viloyatida – 3 329 ta;
- Qoraqalpog‘iston Respublikasida – 3 023 ta;
- Xorazm viloyatida – 2 712 ta;
- Surxondaryo viloyatida – 2 524 ta;
- Jizzax viloyatida – 2 510 ta;
- Navoiy viloyatida – 762 ta holatni tashkil etmoqda.
Izoh (0)