Toshkentda avtomashinada harakatlanish huquqini beruvchi stikerlarni noqonuniy qo‘lga kiritgan shaxslarga jinoyat ishi qo‘zg‘atildi. Bu haqda Bosh prokuratura matbuot kotibi Hayot Shamsutdinov ma’lum qildi.
Toshkent shahar Mirobod tumanida ro‘yxatdan o‘tib, ulgurji savdo turiga ega bo‘lgan “D.F.” MChJ mansabdor shaxslari mansab vakolatlarini suiiste’mol qilib, karantin qoidalariga zid ravishda 7 nafar shaxsni ishga qabul qilish haqida buyruqlarni rasmiylashtirib, Davlat xizmatlari markazidan karantin davrida avtomashinada harakatlanish huquqini beruvchi stikerlarni noqonuniy olishga erishganligi aniqlangan.
Shu kabi yana 9 ta ma’suliyati cheklangan jamiyatning mansabdor shaxslari jami 18 ta holatda stikerlarni noqonuniy qo‘lga kiritgani aniqlangan.
Mazkur holatlar yuzasidan 17-aprel kuni Mirobod tuman prokuraturasi tomonidan Jinoyat kodeksining 192-11, 257-1 va 228-moddalari (Nodavlat tijorat tashkilotida yoki boshqa nodavlat tashkilotida mansabdor shaxslar tomonidan o‘z vakolatlarini suiiste’mol qilish, Mehnatni muhofaza qilish qoidalarini buzish hamda Hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilgan.
Hozirda tergov harakatlari olib borilmoqda.
Avvalroq Ichki ishlar vazirligi matbuot kotibi Shohrux G‘iyosov maxsus stikeri bor avtomobil egalarining barcha hujjatlari to‘liq bo‘lishi kerakligini ma’lum qilgandi.
Mavzuga doir:
Izoh (0)