Koronavirusga chalingan bemorlarni davolash uchun Belgiyada ishlab chiqarilgan 1,6 milliard so‘mlik ekspert toifasidagi Caelus Lite narkoz-nafas olish apparatlari O‘zbekiston Sog‘liqni saqlash vazirligiga beg‘araz taqdim etildi.
Vazirlikning Jamoatchilik bilan aloqalar bo‘limidan ma’lum qilishlaricha, Medec kompaniyasining anesteziologiya stansiyalari sohasidagi 40 yillik tajribasi mahsuli hisoblangan ushbu apparatning asosiy vazifasi — anesteziologiya bo‘lib, ayni paytda o‘pkani sun’iy shamollatish vazifasini ham bajaradi.
International Beverages Tashkent kompaniyasi direktori Muzaffar Solijonovning aytishicha, ushbu apparatlarni sotib olishdan avval vazirlik vakillari bilan maslahatlashilgan. “Ushbu apparatlar koronavirusga chalingan, ahvoli og‘ir bemorlarning tezroq sog‘ayishiga ko‘maklashadi, shifokorlarimizga yaqindan yordam beradi, deb umid qilamiz”, — dedi u.
Avvalroq Prezident Shavkat Mirziyoyev 17-aprel kuni bo‘lib o‘tgan yig‘ilishda xalqaro moliya institutlarining 30 million dollar mablag‘i evaziga o‘pkani sun’iy ventilyatsiya qiluvchi 2,3 mingta apparat sotib olish haqida ko‘rsatma bergan edi.
So‘nggi ma’lumotlarga ko‘ra, Sog‘liqni saqlash vazirligi huzuridagi “Mehr-shafqat va salomatlik” fondiga koronavirus tarqalishiga qarshi choralar ko‘rila boshlanganidan beri 67 milliard so‘mdan ortiq xayriya mablag‘lari kelib tushgan.
Izoh (0)